Суд у Мінску абвясціў прыгавор 10 фігурантам "цукровай справы"

МІНСК, 30 сне – Sputnik. Суд Завадскога раёна Мінска ў чацвер абвясціў рашэнне па крымінальнай справе аб буйных хабарах у цукровай галіне Беларусі, перадаў з залы суда карэспандэнт Sputnik.

Самы вялікі тэрмін атрымаў Міхаіл Крыштаповіч – былы дырэктар Гарадзейскага цукровага завода – ён прыгавораны да 13 гадоў пазбаўлення волі.

Экс-кіраўнік Беларускай цукровай кампаніі Дзмітрый Кірылаў прысуджаны да сямі з паловай гадоў турмы. Мікалаю Прудніку (экс-дырэктару завода ў Слуцку) і Дзмітрыю Ягораву (Скідзельскі завод) за атрыманне хабару суд прызначыў па 11 гадоў. Анатоль Гладкі (былы гендырэктар камбіната ў Жабінцы) атрымаў 8 гадоў пазбаўлення волі, Віктар Міронаў (таксама былы кіраўнік жабінкаўскага прадпрыемства) – 11 гадоў. Бізнесмен з Масквы Сяргей Кананенка за дачу і атрыманне хабараў прыгавораны да сямі гадоў.

Суд таксама пастанавіў спагнаць з часткі абвінавачаных больш за 11 мільёнаў рублёў неабгрунтавана набытай выгады.

На абвяшчэнне прыгавору прыйшлі сваякі і знаёмыя абвінавачаных – у зале суда не было свабодных месцаў. Прыгавор суддзя зачытваў каля паўгадзіны.

Следствам КДБ было ўстаноўлена, што з пачатку 2006 па студзень 2020 года ў Беларусі і Расіі дзейнічала арганізаваная злачынная група, у яе ўваходзілі дырэктары ўсіх чатырох цукровых заводаў Беларусі: Міхаіл Крыштаповіч (Гарадзейскі цукровы завод), Мікалай Пруднік (Слуцкі завод), Дзмітрый Ягораў ( Скідзельскі завод), Анатоль Гладкі і Віктар Міронаў (гендырэктара Жабінкаўскага цукровага завода), а таксама бізнесмен з Масквы Сяргей Кананенка і кіраўнік Беларускай цукровай кампаніі (Масква) Дзмітрый Кірылаў.

Для таго, каб затрымаць шэраг падазроных з ліку дырэктараў цукровых заводаў, прыйшлося развярнуць самалёт, які рухаўся рэйсам Мінск-Мюнхен, і пасадзіць яго ў Гродне.

Рэзанансная гісторыя з вяртаннем самалёта адбылася 24 студзеня 2020 года. Борт з Мінска ў Мюнхен павінен быў вылецець у 12:30, аднак яго затрымалі на тры гадзіны. Самалёт вылецеў, даляцеў да Вроцлава, развярнуўся і паляцеў назад. Пасля гэтага ён экстрана сеў у аэрапорце Абухава ў Гродне. Менавіта з яго аператыўнікі "знялі" некалькі фігурантаў справы.

Судовае следства па справе адбывалася ў адкрытым фармаце.