МІНСК, 6 сту - Sputnik. Дзесяць грамадзян Беларусі звярнуліся ў дыпмісію ў Казахстане, аб гэтым паведамілі ў беларускім пасольстве.
"Ужо звярнулася 10 чалавек, з якіх чатыры чалавекі прынялі рашэнне пакінуць краіну", - паведамілі Sputnik у чацвер у беларускай дыпмісіі.
Па словах дыпламатаў, частка з тых, хто звярнуўся, просяць пракансультаваць, дапамагчы звязацца са сваякамі ва ўмовах перабояў з інтэрнэтам.
"Мы просім нашых грамадзян не панікаваць, не выходзіць без асаблівай патрэбы на вуліцы гарадоў, дзе адбываюцца беспарадкі, не паддавацца на правакацыі, не ўступаць у кантакты з крымінальнымі элементамі", - расказалі ў беларускім пасольстве.
Там таксама адзначылі, што чатыры чалавекі прынялі рашэнне пакінуць краіну, аднаму з іх пасольства аказала садзейнічанне ў набыцці білета на бліжэйшы авіярэйс з Нур-Суртана ў Мінск.
Пасольства знаходзіцца ў пастаянным кантакце з прадстаўнікамі беларускай авіякампаніі "Белавія", а таксама з праваахоўнымі органамі і афіцыйнымі ўладамі Казахстана, адзначылі ў беларускай дыпмісіі.
Там таксама нагадалі, што з учарашняга дня ў пасольстве адкрыта гарачая лінія. У пасольства Беларусі ў Казахстане можна патэлефанаваць па нумарах тэлефонаў: +7 777 870 84 38; +7 71 72 98 66 13 (51).
"Мы просім нашых грамадзян выконваць законныя патрабаванні мясцовых улад і максімальна гарантаваць уласную бяспеку", - сказалі ў пасольстве.