Памёр былы кіраўнік Палаты прадстаўнікоў Беларусі Малафееў

МІНСК, 19 сту - Sputnik. Памёр былы спікер ніжняй палаты беларускага парламента Анатоль Малафееў, перадае карэспандэнт Sputnik.

"Урад смуткуе ў сувязі са смерцю былога старшыні Палаты прадстаўнікоў Нацыянальнага сходу Рэспублікі Беларусь Анатоля Аляксандравіча Малафеева і выказвае шчырыя спачуванні яго родным і блізкім", - гаворыцца ў паведамленні прэс-службы.

Беларускі палітык нарадзіўся 14 мая 1933 года ў Гомелі. За плячыма ў Анатоля Малафеева чыгуначнае вучылішча і Беларускі дзяржаўны эканамічны ўніверсітэт.

Кар'ера савецкага і беларускага дзяржаўнага дзеяча пайшла ў гару пасля заканчэння Вышэйшай партыйнай школы пры ЦК КПСС. Ужо ў наступным годзе ён быў абраны дэпутатам Вярхоўнага Савета СССР.

У 1978 годзе Анатоль Малафееў узначаліў абласны выканаўчы камітэт у родным Гомелі. Цягам 1980-1985 гадоў уваходзіў у прэзідыум Вярхоўнага Савета БССР. У 1986-1991 гадах - член ЦК КПСС.

У лістападзе 1990 года ён стаў першым сакратаром ЦК КПБ, тады ж ён увайшоў у склад Палітбюро ЦК КПСС. У жніўні 1991 года падтрымаў ГКЧП. Пасля паражэння камітэта заставаўся лідэрам ЦК КПБ.

У першыя гады незалежнасці Беларусі працаваў у якасці намесніка начальніка Галоўнага ўпраўлення па дзяржаўных матэрыяльных рэзервах пры Савеце міністраў.

У 1995-1996 гадах Анатоль Малафееў быў дэпутатам Вярхоўнай Рады XII склікання. З 30 лістапада 1996 па 21 лістапада 2000 года - старшыня Палаты прадстаўнікоў Нацыянальнага сходу першага склікання.

Анатоль Малафееў быў узнагароджаны мноствам дзяржаўных узнагарод як савецкага перыяду, так і Рэспублікі Беларусь. Пры яго непасрэдным удзеле распрацоўвалася дамова аб стварэнні супольнасці Беларусі і Расіі. Потым ён працаваў у Парламенцкім Сходзе Саюза Беларусі і Расіі.