МІНСК, 11 лют – Sputnik. Эфектыўнасці работы судовай сістэмы ў Беларусі заўсёды ўдзялялася павышаная ўвага, заявіў кіраўнік дзяржавы Аляксандр Лукашэнка ў ходзе нарады ў Палацы Незалежнасці.
Паводле яго слоў, на абмеркаванне вынесена такая важная тэма, як правядзенне судовых пасяджэнняў у рэспубліцы, у тым ліку па крымінальных справах.
"Два бакі: хтосьці задаволены судовым рашэннем, хтосьці не. Бывае, абодва бакі незадаволеныя. Але часцей адзін задаволены, другі – не. І незадаволены бок хацеў бы абскардзіць рашэнне суда. Сістэма ў Беларусі існуе, але мы прызналі тое, што яе трэба ўдасканаліць з карысцю для людзей", - цытуе прэзідэнта яго прэс-служба.
Магчымасць выправіць памылку павінна быць гарантавана
Кіраўнік дзяржавы нагадаў, што ў суд можа звярнуцца любы чалавек, які мае патрэбу ў абароне праў, парушаных па той ці іншай прычыне. Таму ад суда чакаюць вынясення справядлівага і законнага рашэння. У сувязі з гэтым і рэфармаванне судовай сферы павінна быць узважаным, падкрэсліў Лукашэнка.
"Тым больш, калі справа датычыцца такога адчувальнага для людзей моманту, як абскарджанне рашэнняў суда", - дадаў ён.
На жаль, адзначыў прэзідэнт, нават самы пісьменны і дасведчаны суддзя або пракурор у сваёй працы не застрахаваны ад памылак. І не толькі дробных, тэхнічных, але часам яны могуць прывесці і да асуджэння невінаватага. Таму магчымасць выправіць такую памылку павінна быць гарантавана, заявіў беларускі лідар.
Парадак абскарджання ўдасканальваецца
Лукашэнка ўзгадаў аб прынятым у 2016 годзе рашэнні перайсці ад касацыйнага да апеляцыйнага парадку абскарджання ў крымінальных працэсах, што дае магчымасць вывучыць акалічнасці справы ў судзе другой інстанцыі ў поўным аб’ёме.
У 2019 годзе Вярхоўнаму суду было дадзена даручэнне ўнесці прапановы аб тым, як удасканаліць парадак абскарджання пастановы суда па крымінальнай справе.
"Гэта тое, аб чым я спачатку сказаў: калі чалавек незадаволены, ён мае права звярнуцца са скаргай. І ў 2019 годзе мы вырашылі, што ўдасканалім гэты парадак. У канцы мінулага года Вярхоўны суд прадставіў адпаведны праект закона", - сказаў прэзідэнт.
Апеляцыя і касацыя – у чым розніца?
У сувязі з гэтым кіраўнік дзяржавы папрасіў растлумачыць, навошта ў крымінальны працэс трэба вяртаць касацыю, калі яна ўжо была, пры гэтым захоўваючы апеляцыйную вытворчасць.
"У чым будуць заключацца ключавыя адрозненні паміж апеляцыяй і касацыяй? І як новаўвядзенні паўплываюць на эканамічнасць і аператыўнасць правасуддзя? Не забюракратызаваць правасуддзе і, вядома, не павінна быць падаражэння", - падкрэсліў Лукашэнка.
"Ну, і самае галоўнае – у чым карысць гэтага праекта не толькі для праваахоўнай і судовай сістэм, але самае галоўнае – для нашых грамадзян?" - рэзюміраваў прэзідэнт.
>>> Хочаце яшчэ больш актуальных і цікавых навін – падпісвайцеся на Telegram-канал Sputnik Беларусь
Чытайце таксама:
Законы аб УНС і праўках у выбарчым праве распрацуюць у 2022 годзе
Апублікаваны поўны тэкст праекта закона "Аб генацыдзе беларускага народа"
Лукашэнка параўнаў Кодэкс аб адукацыі з новай Канстытуцыяй
Раскрыты дэталі праекта закона аб адказнасці за заклікі да санкцый
Парламентарыі працуюць над зменамі "наркатычных артыкулаў" - Качанава