Зяленскі: Кіеў будзе рыхтавацца да наступных перагавораў

МІНСК, 9 сак – Sputnik. Прэзідэнт Украіны Уладзімір Зяленскі заявіў, што Кіеў будзе рыхтавацца да чарговага раунда перагавораў з Масквой.

Нагадаем, тры сустрэчы прадстаўнікоў Украіны і Расіі ўжо адбыліся, усе прайшлі на тэрыторыі Беларусі.

Ён таксама адзначыў, што 8 сакавіка з горада Сумы былі эвакуіраваны некалькі тысяч чалавек.

"Учора нам нарэшце ўдалося арганізаваць гуманітарны калідор з Сум у Палтаву. Выратавалі 1600 студэнтаў і 3500 жыхароў горада", – сказаў Зяленскі.

Па інфармацыі ўкраінскіх улад, на працягу аўторка па гуманітарным калідоры з Сум выйшлі дзве калоны. Сярод замежных студэнтаў, у прыватнасці, былі грамадзяне Індыі і Кітая.

Закрануў Зяленскі і эвакуацыю з населеных пунктаў Кіеўскай вобласці. Адтуль, паводле слоў прэзідэнта Украіны, "вывезлі ўжо больш за 18 тысяч чалавек".

Прэзідэнт Украіны чарговы раз заявіў, што чакае ад заходніх краін прадастаўленне самалётаў і раскрытыкаваў іх за прамаруджванне ў гэтым пытанні.

"Украіна з першага дня паўтарае партнёрам: калі вы не закрыеце неба, вы будзеце таксама адказны за гэтую катастрофу. Але рашэння няма", – заявіў Зяленскі.

Пры гэтым ён падзякаваў Польшчы, якая заявіла, што гатова прадаставіць Украіне самалёты. Аднак, паводле слоў Зяленскага, для гэтага трэба вырашыць шэраг тэхнічных пытанняў.

Першая сустрэча дэлегацый Расіі і Украіны прайшла 28 лютага на ўкраінска-беларускай мяжы ў Гомельскай вобласці. Бакі абмежаваліся кароткімі заявамі, пасля чаго адбылі на кансультацыі ў свае сталіцы.

Другі раунд перагавораў адбыўся 3 сакавіка ў Белавежскай пушчы. Бакі вызначыліся па гуманітарных калідорах для эвакуацыі мірнага насельніцтва і спыненні агню на час іх адкрыцця.

Трэцяя сустрэча адбылася 7 сакавіка, таксама ў Белавежскай пушчы.

Як заявіў па выніках трэцяга раунда памочнік прэзідэнта Расіі Уладзімір Мядзінскі, на сустрэчы было рубам пастаўлена пытанне аб гуманітарных калідорах. Ён падкрэсліў, што дамоўленасць аб іх была дасягнута яшчэ на мінулым тыдні, аднак гуманітарныя пераходы не працавалі з-за невыканання абавязацельстваў украінскімі вайскоўцамі.

Па словах Мядзінскага таксама была працягнута дыскусія па палітычных і ваенных аспектах, але яна ідзе няпроста. Мядзінскі прызнаўся, што чаканні расійскай дэлегацыі ад перагавораў не апраўдаліся, але ёсць надзея наступным разам зрабіць істотны крок наперад.

Прэзідэнт Расіі Уладзімір Пуцін 21 лютага заявіў аб прызнанні суверэнітэту Данецкай і Луганскай народных рэспублік і падпісаў адпаведныя ўказы.

Пазней кіраўнікі ДНР Дзяніс Пушылін і ЛНР Леанід Пасечнік звярнуліся да расійскага лідара з просьбай аказаць дапамогу ў адбіцці агрэсіі з боку Узброеных сіл Украіны.

24 лютага Пуцін аб’явіў аб пачатку ваеннай спецаперацыі ў Данбасе. Пры гэтым ён адзначыў, што ўся адказнасць за кровапраліцце будзе на сумленні кіруючага ва Украіне рэжыму, і заклікаў украінскіх вайскоўцаў скласці зброю.