Колькасць замежных ваенных у Польшчы і Балтыі вырасла ўдвая – Савет бяспекі

МІНСК, 12 мая – Sputnik. Колькасць замежных ваенных у Польшчы і краінах Балтыі з 2020 года вырасла больш як у два разы, заявіў дзяржаўны сакратар Савета бяспекі Беларусі Аляксандр Вальфовіч.

Паводле яго інфармацыі, у цяперашні час у гэтых краінах размешчана больш за 20 тысяч замежных вайскоўцаў. Усе яны аснашчаныя сучаснымі ўдарнымі ўзбраеннямі.

Таксама ён паведаміў, што групоўка ўзмацнення авіяцыі НАТА ўжо налічвае больш за 90 самалётаў і прыкладна 40 з іх базуюцца менавіта ў Польшчы і краінах Балтыі. У параўнанні з 2020 годам гэтая групоўка ўзрасла ў еўрапейскіх краінах больш як у чатыры з паловай разы, а ў Польшчы і Балтыі – больш чым у два з паловай разы, праінфармаваў дзяржсакратар Савета бяспекі. Акрамя таго, узмоцнена і ваенна-марская групоўка ў акваторыі Балтыйскага і Міжземнага мораў.

Вальфовіч таксама не выключае, што ЗША ўжо стварылі супрацьспадарожнікавую зброю і ўзброілі ёй нацыянальныя касмічныя сілы. Ён выказаў трывогу наконт таго, што вядучыя краіны асвойваюць новыя прасторы для вядзення ваенных дзеянняў.

Вальфовіч лічыць, што такі аднабаковы мараторый можна разглядаць як заклік да іншых краін, якія яшчэ не завяршылі такія выпрабаванні, прыпыніць уласныя распрацоўкі ў гэтай сферы.

Кіраўнік Савета Бяспекі мяркуе, што ЗША імкнуцца захаваць сваё дамінаванне, разбурыўшы вось Расія-Кітай. Таксама яны, паводле слоў Вальфовіча, спрабуюць не дапусціць дыялогу Расіі "са здаровымі сіламі ў Еўрасаюзе, якія не прымаюць дыктату Белага дома".

Дзяржсакратар лічыць, што менавіта гэтым і абгрунтаваны выхад Вялікабрытаніі з ЕС і ўтварэнне новага ваеннага альянсу AUКUS (Аўстралія, Брытанія, ЗША). Гэтым тлумачыцца і цэлы шэраг іншых эканамічных, палітычных і ваенных трансфармацый, мэтай якіх, на яго думку, з’яўляецца не прапусціць узнікнення альтэрнатыўных амерыканскаму варыянтаў будучага светаўладкавання.