Параненых украінскіх вайскоўцаў з "Азоўсталі" вывязуць на лячэнне ў ДНР – Мінабароны РФ

МІНСК, 16 мая – Sputnik. Міністэрства абароны Расіі паведаміла аб дасягненні дамоўленасці з ваеннымі Украіны аб тым, каб вывезці параненых з камбіната "Азоўсталь" у Марыупалі.

Там адзначылі, што зараз у раёне "Азоўсталі" аб’яўлены рэжым цішыні і адкрыты гуманітарны калідор. Па гэтым калідоры ўкраінскія вайскоўцы адпраўляюцца ў Новаазоўск ДНР. Там ім акажуць усю неабходную медыцынскую дапамогу, паведамілі ў Мінабароны Расіі.

Роўна месяц таму, 16 красавіка, афіцыйны прадстаўнік Мінабароны РФ Ігар Канашэнкаў заявіў, што ад украінскай арміі, замежных наёмнікаў і неанацыстаў з палка "Азоў" (супраць баевікоў якога ў Расіі ўзбуджана крымінальная справа) зачышчаны ўвесь Марыупаль. Рэшткі ўкраінскай групоўкі заблакіраваны на металургічным камбінаце "Азоўсталь".

Раней шэраг СМІ распаўсюдзіў інфармацыю аб нібыта заблакіраваных на тэрыторыі "Азаўсталі" замежных інструктарах і разведчыках.

На гэта прэс-сакратар прэзідэнта РФ Дзмітрый Пяскоў сказаў журналістам, што не можа меркаваць аб тым, наколькі гэта праўда, і пераадрасаваў пытанне вайскоўцам.

"Я не магу неяк меркаваць, наколькі адпавядаюць рэчаіснасці гэтыя паведамленні СМІ. Думаю, што гэта цалкам і поўнасцю ўсё ж прэрагатыва нашых вайскоўцаў, якія займаюцца гэтым пытаннем", – сказаў Пяскоў.

Аб пачатку ваеннай спецаперацыі ў Данбасе заявіў прэзідэнт Расіі Уладзімір Пуцін. Гэта адбылося 24 лютага, пасля прызнання РФ незалежнасці Данецкай і Луганскай народных рэспублік.

Кіраўнік расійскай дзяржавы абазначыў мэты спецаперацыі – дэмілітарызацыя і дэнацыфікацыя Украіны.

У Мінабароны РФ запэўнілі, што наносяць удары толькі па аб’ектах ваеннай інфраструктуры Украіны і ўкраінскіх войсках.