Ці пагражае Беларусі голад, распавялі ў Мінсельгасхарчы

МІНСК, 8 чэр – Sputnik. У Беларусі ўзровень вытворчасці мяса-малочнай прадукцыі ў некалькі разоў перавышае ўзровень яе спажывання, расказаў у эфіры тэлеканала "Беларусь 1" міністр сельскай гаспадаркі і харчавання краіны Ігар Брыло.

Паводле яго інфармацыі, малака беларусы спажываюць не менш за 3 мільёны тон, а экспартуе краіна больш за 4 мільёны тон. Звыш 35% ад мяса таксама ідзе на знешнія рынкі. Гэта сведчыць аб тым, што па гэтай прадукцыі ў Беларусі створаны даволі значны запас, падкрэсліў міністр.

Што да агароднінных культур, то ў краіне таксама вырабляецца больш, чым спажываецца насельніцтвам. "Плюс мы плануем павелічэнне вытворчасці агароднінных культур", - дадаў Брыло.

Дэфіцытнымі ў Беларусі з'яўляюцца толькі садавіна і ягады, але і іх вытворчасць плануецца таксама павялічваць.

"Які голад можа пагражаць Рэспубліцы Беларусь, калі ўзровень самазабеспячэння вельмі высокі?" - падкрэсліў кіраўнік харчовага ведамства.

Ігар Брыло нагадаў, што ў краіне дзейнічае забарона на вываз збожжа.

Беларусь экспартавала ўдабрэнні ў многія краіны, але некаторыя дзяржавы разарвалі з рэспублікай адносіны, а значыць, засталіся без беларускага калію.

"Я ведаю, што ўжо шмат пытанняў па ўдабрэннях узнікае ў еўрапейскіх краінах. Цудаў не бывае. Проста так у адно імгненне ўзяць і замяніць нейкі прадукт, які быў на тваім рынку дастаткова трывалы і ў вялізных аб'ёмах, а Беларусь уваходзіць у топ вытворцаў удабрэнняў у свеце, складана", - адзначыў міністр.

Ён лічыць, што замясціць нашы ўдабрэнні вельмі складана, таму ён прапанаваў тым краінам, якія адмовіліся ад беларускай прадукцыі "паэксперыментаваць".

"Сваімі санкцыямі вы найперш крыўдзіце свайго вытворцу, свайго чалавека, які недаатрымае прадукцыю, грашовую выручку. Каму ад гэтага будзе лягчэй?" - здзіўляецца Брыло.