Суд па справе аб спробе дзяржперавароту зрабілі адкрытым

МІНСК, 29 ліп – Sputnik. Мінскі абласны суд пачынае разгляд крымінальнай справы аб спробе дзяржаўнага перавароту, перадае карэспандэнт Sputnik.

Калегія па крымінальных справах Мінскага абласнога суда будзе разглядаць справу ў выязным судовым пасяджэнні – у Мінскім раённым судзе. У гэтым жа судзе разглядалі і крымінальную справу Марыі Калеснікавай і Максіма Знака.

Па гэтай справе праходзяць пяць абвінавачаных, тры з якіх – юрыст з падвойным грамадзянствам Юрый Зянковіч, палітолаг Аляксандр Фядута і лідар апазіцыйнай партыі Рыгор Кастусёў абвінавачваюцца ў змове, здзейсненай з мэтай захопу дзяржаўнай улады неканстытуцыйным шляхам (ч. 1 арт. 357 КК), а яшчэ два фігуранты – Вольга Галубовіч і Дзяніс Краўчук – у актыўным удзеле ў групавых дзеяннях, якія груба парушаюць грамадскі парадак (ч. 1 арт. 342 КК).

Акрамя гэтага, Зянковічу інкрымінаваны стварэнне экстрэмісцкага фарміравання і кіраўніцтва такім фарміраваннем (ч. 1 арт. 361-1 КК), заклікі да захопу дзяржаўнай улады (ч. 3 арт. 361 КК), распальванне сацыяльнай варожасці і звады, учыненае групай асоб (ч. 3 артыкула 130 КК).

Судовы працэс па справе аб спробе дзяржаўнага перавароту зрабілі адкрытым пасля таго, як дзяржаўны абвінаваўца заявіў адпаведнае хадайніцтва.

Як перадае карэспандэнт Sputnik, як толькі з'явілася інфармацыя аб тым, што працэс зрабілі адкрытым, да будынка суда прыбылі сваякі абвінавачаных, у тым ліку жонка Аляксандра Фядуты.

Як заявіла Sputnik абаронца Кастусёва адвакат Інэса Аленская, з іх, як і іншых удзельнікаў працэсу, была ўзята падпіска аб невыдаванні.

"На жаль, абарона звязана падпіскай аб невыдаванні звестак папярэдняга следства і таму не можа паведамляць аб стратэгіі абароны, аб пазіцыях абвінавачаных, аб іншых абставінах", - сказала Аленская.

У сваю чаргу дачка Кастусёва Кацярына паведаміла, што, як ёй вядома з пісем, яе бацька на стадыі папярэдняга следства сваю віну не прызнаў.