Землятрус у Турцыі і Сірыі: што вядома на дадзены момант

МІНСК, 7 лют – Sputnik. Яшчэ адзін землятрус магнітудай 5,6 адбыўся ў цэнтральнай Турцыі ў ноч на аўторак, паведамляе Еўрапейска-Міжземнаморскі сейсмалагічны цэнтр (EMSC).

Падземныя штуршкі былі зафіксаваны ў 03:13 па часе UTC (06:13 па мінскім часе).

Эпіцэнтр землятрусу знаходзіўся на глыбіні двух кіламетраў на адлегласці пяці кіламетраў ад раёна Гёльбашы.

Першы магутны землятрус здарыўся ў ноч на панядзелак, яго магнітуда склала 7,4. Эпіцэнтр размяшчаўся на глыбіні сем кіламетраў у правінцыі Кахраманмараш, аднак моцныя штуршкі адчуваліся яшчэ і ў шэрагу іншых рэгіёнаў.

На працягу сутак падземныя штуршкі рознай магнітуды паўтараліся. Пасля землятрусу на газаправодзе ў паўднёвай частцы Турцыі адбыўся выбух і пажар. Рэйсы ў аэрапорт Аданы на паўднёвым усходзе Турцыі спынены.

На месцах завалаў працягваюцца выратавальныя аперацыі. Сіноптыкі ў зоне землятрусу прагназіруюць снегапад і дажджы, што можа ўскладніць работу ратавальнікаў на месцах катастрофы.

Колькасць загінулых па даных на раніцу аўторка ўзрасла да 3 381 чалавека, 20 436 атрымалі раненні.

Землятрус у Турцыі стаў самым магутным з 1939 года. З-за трагедыі ў рэспубліцы на тыдзень аб’яўлена жалоба.

Напярэдадні стала вядома, што Беларусь адправіць у Турцыю ратавальнікаў для правядзення пошукавых аперацый. Акрамя таго, як чакаецца, у пацярпелую ад землятрусу Сірыю будзе накіравана гуманітарная дапамога – гэтае пытанне зараз разглядаецца.

Раней у беларускім МЗС паведамлялі, што сярод пацярпелых ад землятрусу няма грамадзян Беларусі. У аўторак стала вядома, што двое беларусаў у Турцыі не выходзяць на сувязь.

Аб тым, што адчуваліся водгаласы землятрусу, паведамлялі ў шэрагу іншых краін: Ліване, Іраку, Ізраілі і іншых. У прыватнасці, у панядзелак наймацнейшы землятрус за апошнія 40 гадоў зафіксаваны нават у паўночна-заходняй частцы штата Нью-Йорк.

Больш за ўсё ад стыхіі пацярпела Сірыя. На гэты момант вядома больш як пра 700 загінулых, пацярпелі амаль паўтары тысячы чалавек. Шэраг краін паведаміў аб намеры выдзеліць фінансавую і гуманітарную дапамогу ўладам, а таксама накіраваць ратавальнікаў.

Як растлумачылі ў Адзінай геафізічнай службе РАН РФ, афтэршокі могуць адбывацца ў радыусе да 300 кіламетраў.

У Інстытуце тэорыі прагнозу землятрусаў і матэматычнай геафізікі РАН распавялі, што прадказаць за суткі землятрус у Турцыі было немагчыма – яго прагназіравалі ў бліжэйшыя пяць гадоў на тэрыторыі, якая перавышае памеры краіны.

Прэзідэнт Расіі Уладзімір Пуцін накіраваў спачуванні прэзідэнтам Турцыі і Сірыі і прапанаваў дапамогу расійскіх спецыялістаў у ліквідацыі наступстваў землятрусу. Свае спачуванні накіраваў і беларускі лідар Аляксандр Лукашэнка.