Кітай і Расія прынялі сумесную заяву

МІНСК, 21 сак – Sputnik. Расія і Кітай у аўторак па выніках перагавораў лідараў дзвюх краін Уладзіміра Пуціна і Сі Цзіньпіна прынялі сумесную заяву.

Тэкст дакумента апублікаваны на афіцыйным сайце Крамля.

У ім, у прыватнасці, Кітайская Народная Рэспубліка і Расійская Федэрацыя выказалі намер аказваць узаемную падтрымку па абароне інтарэсаў адна адной, і ў першую чаргу – суверэнітэту, тэрытарыяльнай цэласнасці і бяспецы.

Бакі таксама дамовіліся рэгулярна ажыццяўляць сумеснае патруляванне на моры і ў паветры і праводзіць сумесныя вучэнні.

Акрамя таго, у заяве бакі заклікаюць да адыходу ад далейшага паглыблення крызісу ва Украіне і ад яго трансфармацыі ў некантралюемы працэс. Для гэтага павінны быць спынены любыя крокі, якія садзейнічаюць эскалацыі і зацягванню баявых дзеянняў на ўкраінскай тэрыторыі.

У ядзернай вайне не можа быць пераможцаў, і яна ніколі не павінна быць развязана, падкрэсліваецца ў дакуменце. Бакі пацвердзілі і неабходнасць больш хуткага запуску перагавораў аб стварэнні на аснове расійска-кітайскага праекта дагавора аб прадухіленні размяшчэння зброі ў касмічнай прасторы.

У ім таксама выказана заклапочанасць Пекіна і Масквы тым, што НАТА ўзмацняе сувязі з краінамі Азіяцка-Ціхаакіянскага рэгіёна па ваенных пытаннях. У сувязі з гэтым РФ і Кітай заклікалі Альянс з павагай ставіцца да суверэнітэту іншых дзяржаў і лічыцца з іх інтарэсамі.

Акрамя гэтага, у сумеснай заяве гаворыцца, што абедзве краіны выступаюць супраць навязвання Захадам сваіх каштоўнасцей іншым дзяржавам, паколькі "вышэйшай дэмакратыі" не існуе. У ім таксама выказваецца пратэст любым аднабаковым санкцыям, якія ўстаноўлены ў абход Савета бяспекі ААН.

У заяве ўдзелена ўвага і сітуацыі на Карэйскім паўвостраве. Масква і Пекін занепакоены і заклікаюць усе зацікаўленыя краіны праяўляць спакой і быць стрыманымі.

Таксама ў сумесным дакуменце Расія пацвярджае сваю прыхільнасць да прынцыпу "аднаго Кітая" і прызнае, што Тайвань неадемная частка КНР.

Як паведамлялася, старшыня КНР прыбыў у Расію з дзяржаўным візітам 20 сакавіка па запрашэнні Уладзіміра Пуціна.

Гэта першая замежная паездка Сі Цзіньпіна пасля таго, як яго трэці раз перавыбралі на пасаду кіраўніка Кітая. Прыбыўшы ў РФ у панядзелак, кітайскі лідар заявіў, што Пекін і Масква – надзейныя партнёры і КНР гатова разам з РФ стаяць на варце міжнароднага права.

Візіт старшыні КНР у Маскву завершыцца 22 сакавіка.