На што атрымальнікі трацяць сямейны капітал, распавялі ў Мінпрацы

МІНСК, 12 кра – Sputnik. У Беларусі для шматдзетных сямей адкрыта ўжо больш за 125 дэпазітаў сямейнага капіталу, паведамляе Міністэрства працы і сацабароны.

Ведамства прыводзіць даныя на 1 красавіка гэтага года. На гэтую дату ў рэспубліцы адкрыты 82,6 тыс дэпазітаў на 826 млн долараў. Рублёвых дэпазітаў – 42,5 тыс (1,02 млрд рублёў).

Распарадзіцца сямейным капіталам датэрмінова захацелі больш за 69 тыс яго атрымальнікаў. Абсалютная большасць (46%) пажадала палепшыць жыллёвыя ўмовы. Пададзена прыкладна 57,9 тыс такіх заяў.

Заяў на медыцынскія паслугі пададзена 6,8 тыс. На атрыманне адукацыі – 4,7 тыс, на набыццё тавараў для інвалідаў – 5.

На пачатак красавіка дзяржава адобрыла каля 67 тыс заяў (на ўсе мэты). Больш за ўсё – у Брэсцкай вобласці (звыш 14 тыс). На другім месцы Мінская вобласць (11,5 тыс), а на трэцім Гомельская (10,7 тыс).

Дэпазіты сямейнага капіталу пачалі адкрываць у Беларусі каля васьмі гадоў таму. Спачатку яго прызначалі ў доларах. Кожнай сям’і, дзе нарадзілася ці было ўсыноўлена трэцяе дзіця, з пачатку 2015 года належала па 10 тыс, і праграму курыраваў Банк развіцця.

Пры гэтым хаця б адзін з бацькоў павінен мець беларускае грамадзянства. На момант прызначэння капіталу ў сям’і павінна быць не менш за трох дзяцей ва ўзросце да 18 гадоў.

Спачатку траціць капітал дазволілі на пэўныя мэты і з той даты, калі споўніцца 18 гадоў таму дзіцяці, пасля нараджэння якога адкрылі дэпазіт.

У 2019 годзе праграма павінна была скончыцца, але яе вырашылі прадоўжыць да канца 2024-га. Умовы памянялі – у тым ліку дазволілі датэрмінова траціць грошы на некаторыя віды лячэння, адукацыю і паляпшэнне жыллёвых умоў.

Таксама праграму зараз курыруе не Банк развіцця, а Беларусбанк. Там адкрываюцца рахункі ў рублях, у 2023 годзе сума складае 29 950 рублёў. Многія ўладальнікі дэпазітаў аддаюць перавагу накіроўваць гэтыя грошы на жыллё.