Папа накіроўвае з візітам у Беларусь архібіскупа Гуджэроцці

МІНСК, 2 мая – Sputnik. Папы Рымскі Францыск прыняў рашэнне накіраваць у Беларусь з візітам былога нунцыя ў Мінску архібіскупа Клаўдыё Гуджэроцці, падставай для візіту стануць урачыстасці ў Будславе, паведамілі ў Рымска-каталіцкай царкве ў Беларусі.

Архібіскуп Гуджэроцці ўзначальваў пасольства Ватыкана ў Мінску ў 2011-2015 гадах, ён добра вядомы ў Беларусі. Будучы апостальскім нунцыем, падтрымліваў міжканфесійныя кантакты, а таксама кантакты з беларускімі ўладамі. Прыязджаў ён у Беларусь і пасля заканчэння сваёй місіі ў якасці апостальскага нунцыя.

Будслаўскі фестываль – адно з самых вядомых і масавых каталіцкіх мерапрыемстваў у Беларусі. Вобраз Будслаўскай іконы Божай Маці – цудатворны, гэта самая ўшанаваная каталіцкая святыня ў Беларусі. На 400-годдзе святыні на Будслаўскі фэст сабралася каля 50 тысяч паломнікаў, не толькі з Беларусі, але і з суседніх краін – Латвіі, Літвы, Польшчы, Расіі, Украіны.

Будслаўскія ўрачыстасці, як правіла, праходзяць у першых чыслах ліпеня.

Што да анансаванага візіту архібіскупа Гуджэроцці, варта адзначыць, што, калі ён з'язджаў з Беларусі пасля заканчэння сваёй місіі ў якасці нунцыя, то развітальны візіт здзейсніў у Будслаў. Ён неаднаразова прысутнічаў на Будслаўскім фестывалі, які ў 2018 годзе быў уключаны ў спісак нематэрыяльнай культурнай спадчыны чалавецтва ЮНЕСКА.

Прыязджаў Гуджэроці ў Беларусь і ў канцы 2020 года – тады ён сустракаўся з беларускім прэзідэнтам Аляксандрам Лукашэнкам.