Мінздароўя зноў дазволіла прыватным аптэкам прадаваць лекі па рэцэптах

МІНСК, 3 чэр – Sputnik. Беларускае Міністэрства аховы здароўя прыняло рашэнне адмяніць раней прынятую забарону на рэалізацыю рэцэптурных лекавых прэпаратаў у аптэках пятай катэгорыі, гэта вынікае з пастановы профільнага ведамства №96 ад 26 мая, якая афіцыйна апублікавана на Нацыянальным прававым інтэрнэт-партале.

Такім чынам, зараз невялікія аптэкі ўсіх форм уласнасці зноў змогуць прадаваць у сябе лекі па рэцэптах урача.

Рабіць гэта яны могуць з 1 чэрвеня, менавіта з гэтага перыяду набыла моц пастанова Мінздароўя.

Адзначым, што рашэнне адмяніць раней прынятую забарону Міністэрства аховы здароўя было вымушана пасля таго, як гэта запатрабаваў МАРГ, бо такая абмежавальная мера парушала патрабаванні антыманапольнага заканадаўства.

МАРГ таксама ўстанавіў жорсткія тэрміны – зрабіць гэта да 30 мая.

Большасць прыватных аптэк у краіне адносяцца менавіта да пятай катэгорыі. Аптэкі такога тыпу часцей за ўсё размяшчаюцца ў крамах, на вакзалах і ў гасцініцах, гэта значыць у месцах, дзе звычайна бывае шмат людзей.

Па заканадаўстве, да аптэк пятай катэгорыі адносяцца аптэкі, дзе "ажыццяўляецца рознічная рэалізацыя лекавых сродкаў, якая ствараецца ў месцах найбольшага знаходжання насельніцтва (крамы, рынкі, вакзалы, гасцініцы і да т.п.), пры наяўнасці ў юрыдычнай асобы або ІП аптэкі першай або другой катэгорыі".

Раней Мінздароўя таксама прыняло рашэнне для ўдасканалення сістэмы рэалізацыі лекавых сродкаў прадаваць іх не толькі ў розніцу, але і праз інтэрнэт-аптэкі.

Дыстанцыйным спосабам можна купіць толькі безрэцэптурныя лекавыя прэпараты, акрамя спіртазмяшчальных з аб’ёмнай доляй этылавага спірту звыш 25%.

Прадаваць прэпараты праз інтэрнэт-аптэкі змогуць толькі тыя юрыдычныя асобы, у якіх ёсць адпаведная ліцэнзія.

Што датычыцца дастаўкі, то ажыццяўляць яе юрыдычная асоба можа як уласнымі сіламі праз службу дастаўкі, так і з прыцягненнем арганізацыі, якая прадастаўляе кур’ерскія паслугі.