Успомніць усіх памерлых: у праваслаўных прайшла Траецкая субота

Асаблівы дзень памінання памерлых родных і блізкіх – Траецкую Бацькоўскую суботу –адзначае праваслаўная царква 3 чэрвеня 2023 года.

Траецкая субота адзначаецца заўсёды напярэдадні Сёмухі, ці Пяцідзесятніцы, кожны год яна выпадае на розныя даты. Пяцідзесятніца заўсёды прыходзіцца на 50-ы дзень пасля Вялікадня.

"Прынята памінаць падчас асаблівага богаслужэння не толькі блізкіх і родных, але і тых, каго не ведаюць па імёнах, усіх, хто калісьці жыў на зямлі, у тым ліку безыменных воінаў, якія загінулі, абараняючы Айчыну нашу ў розныя гады і стагоддзі", - распавялі Sputnik свяшчэннікі, тлумачачы сэнс гэтага асаблівага дня – Траецкай памінальнай суботы.

З усіх памінальных субот у праваслаўным календары дзве называюцца Сусветнымі – гэта Траецкая Бацькоўская субота і Мясапусная субота напярэдадні Вялікага посту. Падчас Вялікага посту таксама ёсць яшчэ дзве асаблівыя памінальныя суботы – другая і трэцяя.

Суботні дзень у праваслаўі заўсёды прысвечаны памінанню памерлых – гэта сёмы дзень тыдня, перад нядзеляй. Кожная нядзеля лічыцца малым Вялікаднем і тыдзень у праваслаўных пачынаецца не з панядзелка, а з нядзелі.

Свяшчэннікі расказалі, што на Траецкую суботу лічыцца правільным заказваць Саракавуст – штодзённае малітвенае памінанне памерлых на працягу 40 дзён.

Акрамя наведвання царквы ў народзе існуе традыцыя на Траецкую суботу прыходзіць на могілкі, каб успомніць сваіх продкаў. "На Сёмуху – а менавіта так у народзе ў беларусаў называецца Тройца – на могілках бралі салодкія бліны, каб успомніць памерлых", - распавялі культуролагі.

Лічыцца, што вельмі моцна бедаваць і плакаць па памерлых у гэты дзень нельга.

У народзе таксама заўсёды існавала забарона на правядзенне ў гэты дзень вяселля, пышных урачыстасцей. "Гэты дзень – посны. І тычыцца гэта не толькі ежы", - адзначылі культуролагі.

Акрамя гэтага, у суботу перад Тройцай нельга было купацца ў вадаёмах: у беларускім фальклоры Траецкі тыдзень называецца яшчэ Русальным.

Існуюць і асаблівыя прыкметы надвор’я, звязаныя менавіта з Траецкай суботай. Так, калі з’явілася вясёлка ў гэты дзень – чакай удачы і дабрабыту, а дождж абяцае багацце. Калі будзе раса – да ранніх замаразкаў, а калі будзе горача – лета будзе засушлівае.