Мабілізацыйнае вучэнне пачнецца ў Мінскай вобласці

МІНСК, 21 чэр – Sputnik. Мабілізацыйнае вучэнне з ваеннымі камісарыятамі Мінскай вобласці пачнецца ў сераду, 21 чэрвеня, паведаміла прэс-служба беларускага абароннага ведамства на афіцыйным Telegram-канале.

Яно працягнецца да 30 чэрвеня.

Як адзначылі ў Мінабароны, галоўная мэта гэтых вучэнняў – ацаніць ступень гатоўнасці мясцовых улад, ваенкаматаў, дзяржорганаў і арганізацый выконваць задачы ў выпадку мабілізацыі.

У ходзе вучэння плануецца разгарнуць неабходныя аб’екты інфраструктуры, прыцягнуць ваеннаабавязаных і задзейнічаць аўтамабільную тэхніку. Як дадалі ў міністэрстве, робіцца гэта "ў тым ліку ў інтарэсах укамплектавання ваенных камісарыятаў".

Вучэнні і зборы ваеннаабавязаных у Беларусі праводзяцца дастаткова часта. Як адзначаюць у беларускім абаронным ведамстве, усе яны маюць планавы характар.

Так, з 8 па 29 чэрвеня навучальны збор з ваеннаабавязанымі тэрытарыяльных войск праходзіць у Лунінецкім раёне. У ходзе гэтага збору ваеннаабавязаныя рыхтуюцца выконваць задачы ў адпаведнасці з ваенна-ўліковымі спецыяльнасцямі і іх службовым прызначэннем. Гэты навучальны збор завершыцца правядзеннем камандна-штабнога вучэння.

Да гэтага вучэнні тэраабароны праводзіліся і ў Ленінскім раёне беларускай сталіцы. Ваеннаабавязаныя аднаўлялі навыкі стральбы з розных відаў зброі і вучыліся арганізоўваць абарону важных аб’ектаў ад дыверсантаў. Па словах намесніка старшыні Мінгарвыканкама Аляксандра Чэрнікава, вучэнні прайшлі без эксцэсаў і без збояў.

Акрамя таго, у пачатку чэрвеня ў Беларусі завяршыліся спецыяльныя ваенныя вучэнні.

У красавіку гэтага года прэзідэнт Беларусі Аляксандр Лукашэнка заявіў, што ў рэспубліцы трэба праверыць боегатоўнасць Узброеных сіл. Агульнае кіраўніцтва праверкай было ўскладзена на дзяржсакратарыят Савета бяспекі.