Як пачыналася вайна: кадры гістарычнай рэканструкцыі ў Брэсцкай крэпасці

БРЭСТ, 22 чэр – Sputnik. Асноўныя мерапрыемствы пачаліся з традыцыйнага мітынгу-рэквіема, выступленняў высокіх гасцей, песень ваенных гадоў і хвіліны маўчання. Пасля абавязковых прамоў аб ваеннай спадчыне і ўскладання кветак да вечнага агню, на полі каля Кобрынскага ўмацавання Брэсцкай крэпасці з’явіліся рэканструктары, якія амаль штохвілінна аднавілі падзеі 22 чэрвеня 1941 года – першага дня вайны.

Карэспандэнт Sputnik разам з удзельнікамі гістарычнай рэканструкцыі не спаў усю ноч, каб паглядзець на выбухі і грукат ў Брэсцкай крэпасці.

У гэтым годзе ў рэканструкцыі было задзейнічана каля 150 чалавек з Беларусі, Расіі, Літвы і нават далёкай Японіі – у разы менш, чым у мінулыя гады. Аднак, як адзначаюць гледачы, менш відовішчнай ад гэтага яна не стала.

У сцэнарый уключылі асноўныя моманты пачатку Вялікай Айчыннай. Спачатку гледачам паказалі, якім быў апошні мірны дзень – 21 чэрвеня 1941-га. Жыццё ў Брэсцкім гарнізоне працякала сваёй чаргой: бесклапотныя дзеці гулялі ў мяч, запускалі ў неба змея і бегалі навыперадкі; дарослыя весяліліся на танцах, улюбляліся і займаліся сваімі справамі, пакуль у іх жыццё не ўмяшалася вайна.

Рэканструктары аднавілі асноўныя моманты абароны Брэсцкай крэпасці. Для самых эпічных эпізодаў выкарыстоўваліся піратэхніка і спецсродкі. Умоўны "нямецкі" бок задзейнічаў танк, матацыклы і рарытэтны грузавік ЗІЛ-157. Савецкія войскі выкарыстоўвалі бронемашыну, супрацьтанкавыя гарматы і таксама матацыклы.

Гледачам расказалі пра гераічную абарону крэпасці пад кіраўніцтвам маёра Гаўрылава: гітлераўцы каля месяца не маглі ўзяць Цытадэль.

Штогод паглядзець рэканструкцыю ў Брэсцкай крэпасці збіраюцца тысячы чалавек. Упершыню 22 чэрвеня 1941 года быў узноўлены ў 2010 годзе. Увасабляць ваенныя падзеі тады прыязджалі аматары-рэканструктары з Францыі, Вялікабрытаніі, Польшчы, Чэхіі, Аўстрыі, Украіны і іншых краін.