Хатніх жывёл зараз трэба рэгістраваць у адміністрацыі раёна

МІНСК, 24 чэр – Sputnik. Хатніх катоў і сабак у Мінску цяпер неабходна рэгістраваць у службе "адно акно" адміністрацыі раёна, паведамляе партал "Мінск-Навіны".

Адзначаецца, што змяненні звязаны з указам №311 прэзідэнта Беларусі. Гэты дакумент уносіць папраўкі ў пункт 17.7 пераліку адміністрацыйных працэдур, які датычыцца рэгістрацыі жывёл.

Раней рэгістрацыяй хатніх жывёл займаліся арганізацыі, якія ажыццяўляюць эксплуатацыю жыллёвага фонду і (або) прадстаўляюць жыллёва-камунальныя паслугі, сельскія, пасялковыя выканаўчыя камітэты.

Цяпер жа ўпаўнаважаным органам выступаюць раённы, гарадскі выканкам, мясцовая адміністрацыя раёна горада.

Звяртацца ў службу "адно акно" грамадзяніну трэба са спецыяльнай заявай, пры сабе трэба мець дакумент які сведчыць асобу, напрыклад, пашпарт. Гадаванца з сабой прыводзіць няма неабходнасці.

Пасля рэгістрацыі гаспадару сабакі выдаецца пасведчанне і жэтон. Апошні трэба прымацаваць да ашыйніка, які павінен быць на сабаку ўвесь час.

Таксама за сабаку неабходна заплаціць збор: 55,5 рублёў у квартал – за небяспечныя пароды, 11,1 рубля – за ўсе астатнія. Цікава, што за катоў плаціць падатак не трэба.

Каб зняць жывёлу з уліку ў выпадку яе смерці, прапажы або дарэння неабходна звярнуцца ў адміністрацыю раёна.

Шчанюкоў і кацянят трэба зарэгістраваць ва ўзросце да трох з паловай месяцаў. Сабак небяспечных парод рэгіструюць, толькі калі ў гаспадара ёсць сертыфікат аб тым, што ён прайшоў навучанне таму, як абыходзіцца з такімі сабакамі.

У адной кватэры, згодна з правіламі, можа быць зарэгістравана не больш за дзве жывёлы, але ёсць выключэнне. Калі, напрыклад, у кватэры жыве некалькі сямей, то кожная сям’я можа завесці аднаго гадаванца.

Паводле інфармацыі ЖЭУ, у Мінску было зарэгістравана 10 188 сабак і 471 кот.