Беларусь скасавала пагадненне з Кіевам аб ваенна-тэхнічным супрацоўніцтве

МІНСК, 17 жні – Sputnik. Беларускі ўрад прыняў рашэнне дэнансаваць міжурадавае пагадненне з Украінай аб ваенна-тэхнічным супрацоўніцтве, гэта прадугледжана пастановай Саўміна №536 ад 15 жніўня, якая ў чацвер афіцыйна апублікавана на Нацыянальным прававым інтэрнэт-партале.

Пагадненне было падпісана бакамі ў беларускай сталіцы амаль трыццаць гадоў таму – 16 снежня 1994-га.

Таксама скасоўваецца міжурадавы пратакол паміж дзвюма краінамі аб унясенні дапаўненняў у гэтае пагадненне, падпісаны 16 ліпеня 2003 года таксама ў Мінску.

Цяпер, згодна з даручэннем Саўміна, беларускаму знешнепалітычнаму ведамству трэба будзе накіраваць апавяшчэнне ўкраінскаму боку аб дэнансацыі падпісаных раней дакументаў.

Пастанова набыла моц з дня яе прыняцця.

У апошні час Кіеў рэгулярна заяўляе аб выхадзе з шэрагу пагадненняў з Беларуссю, у сваю чаргу Мінск прымае аналагічныя рашэнні.

Так, нядаўна стала вядома, што спынена супрацоўніцтва дзвюх краін у сферы тэхнічнай абароны інфармацыі.

Таксама разарваны дагаворы аб гарантыях у галіне пенсіённага забеспячэння, у галіне авіяцыйнага пошуку і выратавання, падатковае пагадненне.

Пазней кіраўнік беларускай дзяржавы Аляксандр Лукашэнка падпісаў закон, якім разарваў міжурадавае пагадненне паміж Беларуссю і Украінай, якое датычыцца падаткаў.

Такім чынам было спынена дзеянне пагаднення паміж урадамі дзвюх краін аб прадухіленні двайнога падаткаабкладання і папярэджанні ўхілення ад выплаты падаткаў адносна падаткаў на даходы і маёмасць. Але яшчэ да разрыву гэтага пагаднення беларускія кампаніі пазбавіліся магчымасці весці бізнес ва Украіне. Адна з прычын – арышт актываў.

У пачатку жніўня беларускі ўрад прыняў рашэнне разарваць яшчэ адно пагадненне, падпісанае раней з украінскім Кабінетам міністраў – аб умовах і парадку абмену жылых памяшканняў.

На гэтым тыдні Мінск таксама прыпыніў дзеянне міжурадавага пагаднення з Украінай аб прынцыпах супрацоўніцтва ў сферы сувязі.