МІНСК, 19 жні – Sputnik. Мінску сёлета спаўняецца 956 гадоў з дня заснавання, свята горад адзначыць маштабна, заявіў начальнік упраўлення культуры Мінгарвыканкама Віталь Брэль.
Усе мерапрыемствы, прымеркаваныя да чарговай гадавіны сталіцы, аб’яднаны тэмай пад назвай "Сэрца Беларусі – мой родны Мінск".
Паводле слоў Брэля, асноўныя гарадскія святкаванні пройдуць у гістарычнай частцы Мінска: на пляцоўцы каля Палаца спорту, у Верхнім горадзе і каля абеліска "Мінск – горад-герой".
Году міру і стварэння будзе прысвечаны гістарычны фестываль "Мінск старажытны", ён пройдзе ў паркавай зоне ўздоўж праспекта Пераможцаў. Мерапрыемства працягнецца два дні – у суботу і нядзелю з 11:00 да 20:00. Фестываль прадставіць адноўленыя ключавыя падзеі 956-гадовай гісторыі горада, у тым ліку рэканструкцыі ваенных бітваў. Таксама анансавана правядзенне коннага рыцарскага турніру.
На пляцоўцы каля Палаца спорту адбудзецца Міжнародны алімпійскі дзень. У рамках мерапрыемства пройдуць спецыяльны алімпійскі квэст і VII Міжнародныя спаборніцтвы "Мацнейшы пажарны-ратавальнік".
Таксама 9 верасня Музей гісторыі горада Мінска прадставіць сумесную экспазіцыю з музеем Заіра Азгура "Сілуэты старога Мінска". Яна будзе прысвечана Паўночнаму завулку, дзе размешчана старая драўляная забудова, якая з’яўляецца гісторыка-культурнай каштоўнасцю.
У Верхнім горадзе 9 верасня з 11:00 да 18:00 адбудзецца рэспубліканскі фестываль нацыянальных культур. Чакаецца ўдзел прадстаўнікоў больш як 20 нацыянальных дыяспар, якія пражываюць у Беларусі. Госці фестывалю змогуць атрымаць асалоду ад музыкі, пакаштаваць нацыянальныя стравы і прыняць удзел у танцавальных майстар-класах.
У 23:00 9 верасня ў скверы "Старасцінская Слабада" адбудзецца феерверк.
Традыцыйна ў нядзелю 10 верасня пройдзе "Мінскі паўмарафон", а напярэдадні – міжнародны эканамічны форум і беларуска-ўзбекскі жаночы бізнес-форум.
>>> Хочаце яшчэ больш актуальных і цікавых навін – падпісвайцеся на Telegram-канал Sputnik Беларусь, чытайце нас у Дзэн, а таксама сачыце за намі ў сацсетках "Одноклассники" і "ВКонтакте"