МІНСК, 29 жні – Sputnik. Беларусь пакуль што не атрымлівала апавяшчэнняў аб тым, ці прыбудуць на вучэнні АДКБ "Баявое брацтва-2023" запрошаныя назіральнікі ад шэрага суседніх заходніх краін, заявіў у аўторак дзяржаўны сакратар Савета бяспекі рэспублікі Аляксандр Вальфовіч.
"Беларускі бок і сакратарыят АДКБ (…) запрасілі міжнародных назіральнікаў, ваенных аташэ, дыпламатычны корпус, у тым ліку нашых суседзяў – палякаў і літоўцаў", - прыводзіць словы Вальфовіча БелТА.
Паводле яго слоў, пакуль што беларускі бок не атрымаў ад іх адказу.
"Я не ведаю, ці прымуць яны ўдзел", - сказаў ён.
Сумесныя аператыўна-стратэгічныя вучэнні АДКБ "Баявое брацтва-2023" пройдуць на некалькіх палігонах Беларусі з 1 па 6 верасня. Вальфовіч адзначыў, што Беларусь заўсёды прытрымлівалася міжнароднай практыкі і запрашала ваенных аташэ назіраць за манеўрамі, якія праходзілі на яе тэрыторыі.
"Вучэнне выключна планавае, мае адкрыты характар", - падкрэсліў дзяржсакратар Савета бяспекі.
Ён таксама адзначыў, што і Мінск, і беларускія партнёры па АДКБ, у адрозненне ад заходніх краін, заўсёды праводзілі такія вучэнні ў адкрытым фармаце, дэманструючы прыязнасць і прытрымліваючыся абарончай ваеннай дактрыны. Заходнія суседзі апошнім часам пры ваенных вучэннях паблізу ад беларускіх меж не заклікаюць прадстаўнікоў Беларусі назіраць за імі.
"За апошні час нават спроб запрасіць беларускі бок для назірання не было", - сказаў Вальфовіч.
Як раней заяўляў на брыфінгу начальнік Аб'яднанага штаба АДКБ Анатоль Сідараў, назіраць за вучэннямі таксама запрошаны прадстаўнікі Саудаўскай Аравіі, Ірана, Кітая і Манголіі.
Па яго даных, да сумесных вучэнняў, якія пройдуць у Беларусі, будуць прыцягнуты больш за 3,7 тысячы чалавек, у тым ліку да 2,5 тысячы беларускіх вайскоўцаў. З 700 адзінак ваеннай і спецыяльнай тэхнікі 500 будзе ад беларускіх Узброеных сіл. Фінальны этап вучэння пройдзе 6 верасня ў Беларусі і 13 кастрычніка ў Кыргызстане, пасля чаго кантынгенты будуць вернуты ў пункты пастаяннай дыслакацыі.
>>> Хочаце яшчэ больш актуальных і цікавых навін – падпісвайцеся на Telegram-канал Sputnik Беларусь, чытайце нас у Дзэн, а таксама сачыце за намі ў сацсетках "Одноклассники" і "ВКонтакте"
Таксама на Sputnik:
Завершана падрыхтоўка да вучэнняў "Баявое брацтва"
Вучэнні АДКБ "Баявое брацтва" пачнуцца ў Беларусі 1 верасня