Памочнік прэзідэнта РФ прагназіруе ўмацаванне рубля

МІНСК, 11 вер – Sputnik. Новыя меры Цэнтрабанка РФ будуць стрымліваць адток капіталу з Расіі, заявіў памочнік прэзідэнта Расіі Максім Арэшкін на Усходнім эканамічным форуме.

На думку Арэшкіна, гэта павінна стаць адной з прычын умацавання расійскага рубля ў бліжэйшай перспектыве. Акрамя таго, памочнік прэзідэнта заявіў, што імпарт у РФ зараз павінен змяншацца, а экспарт расці з-за аднаўлення сусветных цэн на нафту.

Раней прафесар кафедры аналітычнай эканомікі і эканаметрыкі эканамічнага факультэта БДУ Міхаіл Кавалёў заяўляў Sputnik, што адна з прычын зніжэння курса расійскага рубля – вывад капіталу з РФ. Іншая – падзенне экспарту і рост імпарту.

Менавіта з гэтай прычыны, як адзначаў эксперт, для расійскага бюджэту было выгадна, каб нацвалюта аслаблялася да пэўнага ўзроўню. У такой сітуацыі, на думку Кавалёва, для Нацбанка Беларусі лагічна шукаць кампраміс паміж інтарэсамі экспарцёраў і імкненнем утрымаць інфляцыю. Гэта значыць, беларускі рубель павінны таксама аслабляць, але з меншай хуткасцю, чым расійскі.

Максімальнае значэнне расійскага рубля, згодна з курсам Нацбанка, у гэтым годзе было ў сярэдзіне студзеня – 3,8738 беларускага рубля за сотню расійскіх. Пасля гэтага было зніжэнне, якое часам перарывалася невялікімі перыядамі росту. Самы нізкі курс па Нацбанку быў 15 жніўня – 3,2390 за сто расійскіх. Затым афіцыйны курс крыху вырас і выйшаў на адносна стабільны ўзровень каля 3,34-3,35.

Афіцыйны курс долара з пачатку года, як правіла, павялічваўся. Рэзкія падзенні былі ў сярэдзіне студзеня (2,6162 рубля), у маі (2,7997) і ў жніўні (3,1290), але ў цэлым пакуль што усё роўна ідзе рост.