Томская вобласць жадае развіваць выпуск беспілотнікаў сумесна з Беларуссю

МІНСК, 16 ліс – Sputnik. Пасол Беларусі ў Расіі Дзмітрый Крутой правёў перагаворы з губернатарам Томскай вобласці Уладзімірам Мазурам і абмеркаваў перспектывы сумеснага выпуску беспілотнікаў, паведаміла беларускае пасольства ў Маскве.

Сустрэча праходзіла ў павільёне Беларусі на ВДНГ, дзе пасол правёў экскурсію для губернатара. Уладзімір Мазур зацікавіўся беларускімі беспілотнікамі.

Дзмітрый Крутой і Уладзімір Мазур дамовіліся далей абмеркаваць перспектывы супрацоўніцтва падчас візіту пасла ў Томск. Паездка павінна адбыцца ў першым квартале 2024 года. Пасол паабяцаў прывезці з сабой дэлегацыю "з акцэнтам на распрацоўку" грамадзянскіх беспілотнікаў.

Яшчэ ў 2018 годзе ў Томскай вобласці стартаваў федэральны праект "Тайга". У рэгіёне створаны вопытны раён выкарыстання беспілотных авіяцыйных сістэм. У 2021 годзе, таксама на федэральным узроўні, было вырашана ўстанавіць эксперыментальны прававы рэжым для гэтага праекта.

Аператары вопытнага раёна для беспілотнікаў – гэта даччыная структура кампаніі "Системы. Технологии. Коммуникации" і Томскі дзяржаўны ўніверсітэт сістэм кіравання і радыёэлектронікі.

У раёне ёсць магчымасці беспілотнай авіятэхнікі па дастаўцы грузаў вагой ад 100 грам да 1,5 тон. Таксама адпрацоўваецца аэрафотаздымка і выкарыстанне беспілотнікаў у сельскай гаспадарцы.

Крутой і Мазур абмеркавалі ў Маскве не толькі беспілотнікі, але таксама вынікі нядаўняга візіту томскай дэлегацыі ў Беларусь. Некаторыя дамоўленасці ўжо ўвасабляюцца ў жыццё. Напрыклад, беларускія кампаніі "Амкадор" і "Пажснаб" пастаўляюць тэхніку ў Томскую вобласць.

Наладжваецца супрацоўніцтва ў сферы мікраэлектронікі паміж беларускім "Інтэгралам" і томскім "Микраном".

Таксама жыхары Томска зацікаўлены ў беларускіх тэхналогіях водаачысткі і водападрыхтоўкі. Дзмітрый Крутой падказаў, якая кампанія з Беларусі займаецца гэтым на расійскім рынку. Паводле яго слоў, яна працуе ўжо ў 32 рэгіёнах РФ.