МІНСК, 30 ліс – Sputnik. Старшыня Цэнтрвыбаркама Беларусі Ігар Карпенка запрасіў прадстаўнікоў расійскага ЦВК прыехаць у краіну для назірання за электаральнай кампаніяй.
29-30 лістапада Карпенка здзяйсняе візіт у Санкт-Пецярбург для ўдзелу ў мерапрыемствах, прымеркаваных да 30-годдзя выбарчай сістэмы Расіі. Таксама сёння ён правёў сустрэчу з кіраўніком ЦВК Расіі Элай Памфілавай.
"Ігар Карпенка перадаў Эле Памфілавай запрашэнне прыняць удзел у назіранні за выбарамі ў Беларусі", - паведаміў тэлеграм-канал ЦВК Беларусі ў чацвер.
У час двухбаковай сустрэчы ў Санкт-Пецярбургу Карпенка і Памфілава абмеркавалі ўзаемадзеянне ЦВК дзвюх краін, а таксама намецілі планы далейшых сумесных мерапрыемстваў. Пры гэтым Карпенка падкрэсліў, што ў Беларусі і Расіі агульная гісторыя фарміравання інстытута канстытуцыйнага і выбарчага права.
У ЦВК Беларусі таксама паведамілі, што Карпенка прыняў удзел у сустрэчы з кіраўніком Савета МПА СНД Дзмітрыем Кобіцкім. Сустрэча прайшла ў Таўрычаскім палацы.
Кіраўнік ЦВК Беларусі расказаў аб тым, як у Беларусь будуць запрашаць міжнародных назіральнікаў на будучыя выбары.
Бакі таксама падрабязна абмеркавалі тэму адкрытасці беларускай электаральнай кампаніі.
"Выбарчая кампанія 2024 года пройдзе адкрыта і галосна", - падкрэсліў Карпенка. Дадаўшы пры гэтым, што Мінск мае намер запрасіць назіральнікаў ад розных міжнародных структур, каб яны змаглі пераканацца ў транспарэнтнасці беларускіх выбараў.
Паводле яго слоў, Беларусь разглядае інстытут міжнароднага назірання за выбарамі як магчымасць абмеркавання актуальных праблем.
"Гэта вельмі важна з пункту гледжання далейшага развіцця і дзяржаўнага будаўніцтва, і ў цэлым выбарчай сістэмы", - падкрэсліў ён.
Выбары дэпутатаў у адзіны дзень галасавання пройдуць 25 лютага 2024 года.
"Лічба" і выбары
У Таўрычаскім палацы таксама абмяркоўвалася тэма развіцця інстытута электроннага галасавання падчас выбарчых кампаній. Як раней паведамлялася, у Расіі ў некаторых рэгіёнах прымяняецца такая форма галасавання, Беларусь – пераймае вопыт.
Кіраўнік ЦВК Беларусі адзначыў, што перавод у "лічбавую" форму выбарчага працэсу дастаткова складаная тэма, але ў гэтым напрамку неабходна рухацца.
Расійскі бок перадаў Цэнтрвыбаркаму Беларусі "ўсёабдымную інфармацыю" аб тым, як у РФ праходзіць электроннае галасаванне. Пры гэтым Карпенка адзначыў, што цяпер у эпоху глабальнай інфарматызацыі любая "выбарчая сістэма можа быць схільная да тых ці іншых негатыўных знешніх уздзеянняў".
У сувязі з гэтым ён праінфармаваў расійскіх калег аб тым, што ў Беларусі на заканадаўчым узроўні замацавана паняцце электаральны суверэнітэт.
Карпенка таксама заявіў, што Беларусь пераймае расійскі вопыт дыстанцыйнага электроннага галасавання.
Паводле яго слоў, у Беларусі распрацоўваецца Канцэпцыя лічбавізацыі выбарчага працэсу, гаворка ідзе аб электронным галасаванні для некаторых асобных катэгорый грамадзян.
Як раней паведамляў кіраўнік ЦВК Беларусі на бліжэйшых электаральных кампаніях, якія пройдуць у краіне, электроннае галасаванне прымяняцца яшчэ не будзе.
>>> Хочаце яшчэ больш актуальных і цікавых навін – падпісвайцеся на Telegram-канал Sputnik Беларусь, чытайце нас у Дзэн, а таксама сачыце за намі ў сацсетках "Одноклассники" і "ВКонтакте"