Першыя кветкі да трыпціха: гісторыя помніка бацьку і сыну Яроменкам завяршылася

Хачу быць разам з маімі хлопчыкамі – такое было завяшчанне народнай артысткі Беларусі Галіны Аляксандраўны Арловай, жонкі народнага артыста СССР Мікалая Яроменкі (старэйшага) і маці народнага артыста Расіі Мікалая Яроменкі (малодшага).

Яно выканана, воля нябожчыцы споўнілася. Сёння, 29 лістапада, на Усходніх могілках Мінска да помніка-трыпціха акцёрскай дынастыі Яроменкі-Арловай ускладзены першыя кветкі.

Пры гэтым прысутнічаў калумніст Sputnik Яўген Агурцоў-Кржыжаноўскі.

У гэтай частцы Маскоўскіх могілак, як іх працягваюць называць мінчане, хаваюць толькі самых заслужаных людзей: Пётр Машэраў, Васіль Быкаў, Уладзімір Мулявін, Ігар Лучанок, бацька і сын Яроменкі… І вось Галіна Арлова цяпер навекі, як і марыла, разам са сваімі хлопчыкамі.

Пасляваенны Віцебск не быў раем. Краіна аднаўлялася, жылі ўсе цяжка, але шчыра верылі ў лепшае, у сябе, бо перамаглі. Галіна Аляксандраўна аб сваім знаёмстве з будучым мужам, якое адбылося ў тэатральнай студыі пры Тэатры імя Якуба Коласа, успамінала: "Некалькі гадоў мы сустракаліся, я яшчэ была зусім дзяўчынка. Не звярнуць увагу на яго было немагчыма. Ён з’явіўся ў нашай студыі раскошна: франтавік , малады, прыгожы, таленавіты. Мікалай Яроменка быў высокі, плячысты, з капой кучаравых чорных валасоў і пранізлівым позіркам. Закахалася ў яго ў адно імгненне".

Гэта была адна з самых прыгожых пар у акцёрскай супольнасці Беларусі і самая дастойная – без здрад і скандалаў. А калі ў 1949 годзе нарадзіўся сын Мікола, стала самай прыгожай сям’ёй Віцебска.

Жылі сціпла: камуналка, паркалёвыя сукеначкі, у мужа прыстойны гарнітур з’явіўся праз дзесяць гадоў акцёрскай працы і прызнання гледачоў. Гэта потым ён стане народным артыстам, старшынёй Канфедэрацыі творчых саюзаў Беларусі і сенатарам Нацыянальнага сходу. А для яе ён назаўжды застанецца Яромай.

Мікалай-малодшы жыў у акцёрскім асяроддзі, і яго лёс быў прадвызначаны. Стаў акцёрам, і яго аглушальны поспех у "Пиратах ХХ века", серыяле "Красное и Черное" заканамерны.

У сям’і Яроменкі адразу тры народныя артысты: бацька – Савецкага саюза, маці – Беларусі, сын – Расіі. Аўтар надмагільнага помніка гэтай артыстычнай сям’і – Генадзь Буралкін, які сябраваў з Мікалаем Мікалаевічам. Невыпадкова менавіта яму даручылі стварыць помнік Яроменку-старэйшаму.

Пакуль ішло ўзгадненне праекта, трагічна памірае Яроменка-сын. Адбылася трансфармацыя, і з’явіўся помнік бацьку і сыну, які прастаяў роўна 20 гадоў, да смерці Галіны Аляксандраўны.

Буралкін расказаў, што яшчэ пры стварэнні першага помніка ў 2001 годзе Галіна Аляксандраўна папрасіла пакінуць і ёй месцейка, і што яны з архітэктарам Яўгенам Кавалеўскім загадзя прадугледзелі варыянт трыпціха. Адбылося тое, што і павінна было адбыцца.