ГА ААН прыняла рэзалюцыю аб спыненні агню паміж Палесцінай і Ізраілем

МІНСК, 13 сне – Sputnik. Генеральная асамблея ААН прыняла рэзалюцыю, якая патрабуе неадкладнага спынення агню ў зоне ўзброенага канфлікту паміж Ізраілем і Палесцінай, а таксама вызвалення ўсіх заложнікаў.

У падтрымку рэзалюцыі выступілі 153 краіны, 23 устрымаліся ад галасавання, яшчэ 10 былі супраць прыняцця.

Рэзалюцыя была падрыхтавана Егіптам, які ў дадзены момант старшынствуе ў Арабскай групе ў ААН, і Маўрытаніяй, якая займае пасаду старшыні ў групе краін Арганізацыі ісламскага супрацоўніцтва. Дакумент, як падкрэслілі аўтары, з’яўляецца выключна гуманітарным, пра яго палітызацыю не ідзе і гаворкі.

Так, згодна з прынятай рэзалюцыяй, трэба неадкладна спыніць агонь і вызваліць заложнікаў, забяспечыўшы гуманітарны доступ. У тэксце дакумента вызначаны патрабаванні да ўсіх бакоў канфлікту ў тым, каб яны выконвалі абавязацельствы па міжнародным гуманітарным праве.

У мінулую пятніцу рэзалюцыю з тымі ж патрабаваннямі ў Савеце Бяспекі заблакіравалі ЗША. 13 з 15 дзеючых членаў Савета бяспекі падтрымалі прыняцце дакумента, Вялікабрытанія ўстрымалася.

Шматгадовае супрацьстаянне Ізраіля і Палесціны, выкліканае тэрытарыяльнымі інтарэсамі, абвастрылася 7 кастрычніка бягучага года. Вайскоўцы абодвух бакоў дагэтуль працягваюць абменьвацца ўдарамі.

Ізраіль і ХАМАС пры пасрэдніцтве Катара 22 лістапада дасягнулі першай маштабнай дамоўленасці аб перамір’і з моманту абвастрэння канфлікту. Бакі пагадзіліся на чатыры дні спыніць баявыя дзеянні для абмену заложнікаў.

Чатырохдзённае перамір’е пачало дзейнічаць раніцай 24 лістапада, пасля чаго двойчы працягвалася – спачатку на два дні, затым яшчэ на адзін.

Раніцай 1 снежня тэрмін перамір’я паміж Ізраілем і ХАМАС скончыўся, бакі аднавілі боесутыкненні.

Шэраг міжнародных палітыкаў, у тым ліку ў Расіі і Беларусі, неаднаразова заклікаў канфліктуючыя бакі спыніць супрацьстаянне. На іх думку, урэгуляваць канфлікт можна шляхам стварэння незалежнай палесцінскай дзяржавы. Аднак Ізраіль з гэтым не згодзен.

Колькасць загінулых у сектары Газа з 7 кастрычніка перавысіла 18 тысяч чалавек, пацярпелі больш за 50 тысяч. Як заявілі ў ЦАХАЛ, ізраільская армія за месяц ліквідавала не менш за 5 тысяч баевікоў ХАМАС.

У аўторак 5 снежня ЦАХАЛ перайшла да трэцяй фазы наземнай аперацыі ў сектары Газа, зараз сухапутныя сілы акружаюць самы буйны горад на поўдні анклава – Хан-Юніс.