ДПК: ніводнай легкавушкі і больш за 3 тыс фур на мяжы чакаюць выезду ў ЕС

МІНСК, 16 сак – Sputnik. Больш за 3 тыс фур сабралася ў пунктах пропуску на мяжы Беларусі з сумежнымі краінамі ЕС, пра гэта сведчаць звесткі Дзяржпагранкамітэта Беларусі.

Па даных на 10:00 у суботу, самая вялікая чарга зараз фіксуецца на літоўскім напрамку. Так у двух дзеючых пунктах пропуску – "Каменны Лог" і "Беняконі" – знаходзяцца 2 310 велікагрузаў. З іх у "Каменным Лозе" – 1 140 машын, у "Беняконях" крыху больш – 1 170.

На мяжы Беларусі з Латвіяй таксама адзначаецца вялікая чарга. Сёння ў пункце пропуску "Грыгароўшчына" чакаюць выезду з краіны 735 фур.

На польска-беларускай мяжы чарга ў разы меншая – у пункце пропуску "Казловічы" знаходзіцца 150 велікагрузаў.

Што да легкавога транспарту, ні ў адным ПП чэрг няма.

Літоўскія ўлады прынялі рашэнне з 1 сакавіка закрыць яшчэ два пункты пропуску – "Лаварышкес" і "Райгардас" ("Катлоўка" і "Прывалка" з беларускага боку).

Такім чынам, на мяжы Беларусі з Літвой засталіся толькі два дзеючыя КПП – "Мядзінінкай" ("Каменны Лог" у Беларусі), які з’яўляецца самым вялікім і тэхнічна аснашчаным, і "Шальчынінкай" ("Беняконі").

У Дзяржаўным мытным камітэце Беларусі паведамілі, што перанакіруюць у "Каменны Лог" і "Беняконі" супрацоўнікаў і тэхнічныя сродкі мытнага кантролю з пунктаў пропуску. Такое рашэнне прынята, каб зменшыць час правядзення мытных аперацый у дзеючых пунктах пропуску.

Нагадаем, што два пункты пропуску на беларуска-літоўскай мяжы "Шумскас" (з беларускага боку "Лоша") і "Твярачус" ("Відзы") спынілі працу ў жніўні 2023 года.

Раней афіцыйны прадстаўнік Дзяржпагранкамітэта Беларусі Антон Бычкоўскі заяўляў, што ў літоўскім "Мядзінінкаі" за суткі прапускаюць машын у шэсць разоў меней за норму, а ў астатніх пунктах паказчыкі выконваюцца не больш, чым напалову.

Гэта звязана з закрыццём яшчэ двух ПП на беларуска-літоўскай мяжы. Таксама ўплыў аказваюць нізкая фактычная прапускная здольнасць сумежнага боку і нерытмічнасць працы супрацоўнікаў пункту пропуску з еўрапейскага боку.