Песня "Священная война" стала сімвалам мужнасці, стойкасці і яднання краіны ў гады Вялікай Айчыннай вайны. Аўтарам слоў "Вставай, страна огромная" стаў вядомы савецкі паэт Васіль Лебедзеў-Кумач, ён напісаў знакамітыя радкі ўсяго за ноч – з 22 на 23 чэрвеня 1941 года.
Праз суткі, 24 чэрвеня песню апублікавалі адначасова ў газетах "Известия" і "Красная звезда", і адразу пасля публікацыі з’явілася і музыка, яе напісаў кампазітар Аляксандр Аляксандраў.
Друкаваць словы і ноты тады часу не было, таму, каб падрыхтаваць выкананне, кампазітар запісваў ноты і словы крэйдай на дошцы, а спевакі і музыканты перапісвалі іх у сшытку.
Усяго дзень на рэпетыцыі, і 26 чэрвеня 1941 года "Вставай, страна огромная" упершыню спявалі на Беларускім вакзале ў Маскве. Па ўспамінах відавочцаў, песню ў той дзень выканалі пяць разоў запар. З ёй сыходзілі на фронт байцы Чырвонай Арміі і народнага апалчэння.
Цікава, што да сярэдзіны восені 1941 года песня, па сутнасці, нідзе не гучала. Тады лічылася, што салдаты ідуць не на "смертный бой", а каб вельмі хутка вярнуцца з Перамогай. Упершыню па Усесаюзным радыё і з рэпрадуктараў на галоўных плошчах вялікай краіны "Священная война" прагучала толькі на 116-ы дзень вайны – 15 кастрычніка 1941 года. У той дзень было прынята рашэнне эвакуіраваць з Масквы ўсе прадпрыемствы і ўрад.
Кожны наступны дзень вайны роўна ў 6 гадзін раніцы пачынаўся з гэтай песні для ўсёй вялікай краіны – "Священная война" гучала па радыё адразу пасля бою крамлёўскіх курантаў.
У 2005 годзе на будынку Беларускага вакзала ў Маскве ўстанавілі мемарыяльную дошку – у памяць аб тым, як упершыню была выканана песня "Священная война".
Хочаце яшчэ больш актуальных і цікавых навін – падпісвайцеся на Telegram-канал Sputnik Беларусь, чытайце нас у Дзэн, а таксама сачыце за намі ў сацсетках "Одноклассники" і "ВКонтакте"