МІНСК, 26 чэр – Sputnik. Вядомы беларускі фотакарэспандэнт Юрый Іваноў удастоены звання заслужанага журналіста, перадае карэспандэнт Sputnik.
Сёння ў Беларускім саюзе журналістаў ва ўрачыстай абстаноўцы фотакарэспандэнту Юрыю Іванову за шматгадовую плённую работу ў галіне журналістыкі прысвоена ганаровае званне БСЖ "Заслужаны журналіст".
Узнагароду Іванову ўручыў старшыня БСЖ Андрэй Крывашэеў.
Нагрудны знак "Заслужаны журналіст"
© Sputnik
Юрый Іваноў нарадзіўся ў 1939 годзе ў Сімферопалі. Творчы шлях пачынаў у газетах "Знамя юности" і "Советская Белоруссия". З 1965 года – уласны фотакарэспандэнт Агенцтва друку "Новости" (АДН). У 1987 годзе Іваноў увайшоў у лік 100 найлепшых фатографаў свету.
Аўтар альбомаў "Крэпасць-герой", "Гомель", "Брэст", "Лепель" і больш за 30 персанальных выставак у Беларусі, Расіі, Вялікабрытаніі, Францыі, Японіі і іншых краінах. Лаўрэат прэміі Саюза журналістаў Беларусі. Лаўрэат прэміі "Залатая Літара".
Героямі рэпартажаў аўтара ў розны час былі вядомыя паэты і мастакі, прэзідэнты і каралі, нобелеўскія лаўрэаты і алімпійскія чэмпіёны, музыканты і касманаўты, а таксама гістарычныя падзеі. Іваноў – адзіны фотакарэспандэнт з Беларусі, які атрымаў узнагароду "World Press Photo" і ўдзельнічаў у грандыёзным праекце "Один день из жизни Советского Союза". У выданне ўвайшлі больш за сотню лепшых фатаграфій, у тым ліку тры работы Іванова.
Хочаце яшчэ больш актуальных і цікавых навін – падпісвайцеся на Telegram-канал Sputnik Беларусь, чытайце нас у Дзэн, а таксама сачыце за намі ў сацсетках "Одноклассники" і "ВКонтакте"