Паліна Дзярыба – абсалютная рэкардсменка сёлетняй уступнай кампаніі. Выпускніца 43-й гімназіі Мінска здавала біялогію, хімію і беларускую мову – усё на 100 балаў. Плюс да ўсяго ў дзяўчыны ідэальны атэстат – 10,0.
Да ўсіх трох выпрабаванняў Паліна рыхтавалася апошнія два гады вельмі грунтоўна, але, як сама яна прызнаецца, завучкай сябе не лічыць. Што дапамагло дзяўчыне здаць усе экзамены на максімальны бал, наколькі складанымі былі заданні на ЦЭ і ЦТ і куды плануе паступаць – пра гэта і не толькі абітурыентка расказала Sputnik.
На ўсю краіну такіх 15
Варта адзначыць, што вынік Паліны Дзярыба – не ўнікальны. Максімальны бал на ўсіх ЦЭ і ЦТ сёлета атрымалі 15 чалавек. Зрэшты, гэта ніколькі не прымяншае дасягненні выпускніцы сталічнай гімназіі.
"Я настройвалася на гэты вынік. Заўсёды ставіла перад сабой самыя высокія мэты. Навошта думаць аб іншых паказчыках, калі можна першапачаткова настроіцца на максімальны?" - разважае абітурыентка.
Яна кажа, што на рэпетыцыйных тэсціраваннях заўсёды паказвала вынік 90+ балаў. Але тры "соткі" дзяўчыне пакараліся і раней – на апошняй "рэпетыцыі".
"Для гэтага, вядома, было зроблена шмат працы, і я шчыра спадзявалася на падобны вынік – і ўвогуле ўсё атрымалася. Экзамены былі лёгкія, нармальнага школьнага ўзроўню. Трапляліся і "пасткі" – новыя заданні, якія раней у тэстах не сустракаліся ", - звяртае ўвагу дзяўчына.
Па слядах мамы
Паліна прызнаецца, што атрымаць максімальна магчымыя чатыры "соткі" яе заматывавалі прахадныя балы на спецыяльнасць, пра якую яна марыць з дзяцінства.
"Хачу на стаматалогію ў Беларускі дзяржаўны медыцынскі ўніверсітэт. Летась прахадны там быў 395 балаў. Разумела: або я выдаю максімальны вынік і спакойна праходжу на бюджэт, або шукаю абходныя шляхі. Абходныя шляхі шукаць не хацелася", - усміхаецца субяседніца.
Тое, што Паліна хоча быць медыкам, яна зразумела яшчэ ў дзяцінстве. Па словах дзяўчыны, яе заўсёды прыцягваў гэты кірунак, а маці, якая шмат гадоў працуе на хуткай дапамозе, падтрымала дачку.
"Мяне ніхто не прымушаў, проста я для сябе прыняла рашэнне такое. Мне гэта вельмі цікава, я сябе не бачу ні ў чым іншым", - заяўляе яна.
Выдатніца, але не батанік
Паліна – залатая медалістка, у атэстаце ў яе ўсе дзесяткі. Матэматыка, мовы, фізіка, фізкультура, хімія і асабліва біялогія – па ўсіх прадметах дзяўчына дэманстравала дзіўныя здольнасці на працягу ўсёй вучобы. Але прызнаецца, што батанікам сябе не лічыць.
"Усю сваю школу, з першага па адзінаццаты клас, я была выдатніцай, у мяне заўсёды былі адзнакі 9-10. У старшых класах прыйшлося крышку папрацаваць, каб сярэдні бал стаў 10,0. Таму што я разумела, навошта мне гэта трэба", - тлумачыць абітурыентка.
Яна прызнаецца, што да выпускнога класа яна ўжо паспела ўвайсці ў "рэжым" і навучылася размяркоўваць час: пару гадзін на падрыхтоўку да экзаменаў, яшчэ пару гадзін – на чытанне мастацкіх кніг і ігру на ўкулеле.
Паліна Дзярыба з класным кіраўніком і настаўнікам беларускай мовы Людмілай Каспяровіч
© Photo : из личного архива Полины Дерибо
"Раней займалася спартыўнымі бальнымі танцамі, аднак прыйшлося кінуць іх з-за вучобы – адбіралі шмат часу і сіл. Прыйшлося расставіць прыярытэты", - падкрэслівае дзяўчына.
Паліна адзначае, што пасля экзаменаў і будучай уступнай кампаніі трэба добра адпачыць, каб набрацца сіл перад вучобай у БДМУ. На пытанне, якую параду выдатніца можа даць абітурыентам наступных гадоў, яна кажа так:
"Раю паставіць дакладную мэту, якая будзе даваць матывацыю, і дадаць да яе дысцыпліну. А яшчэ шмат-шмат працаваць. І усё атрымаецца!" - падагульняе яна.
Хочаце яшчэ больш актуальных і цікавых навін – падпісвайцеся на Telegram-канал Sputnik Беларусь, чытайце нас у Дзэн, а таксама сачыце за намі ў сацсетках "Одноклассники" і "ВКонтакте"