МІНСК, 25 ліп - Sputnik. Прэзідэнты Беларусі і Расіі Аляксандр Лукашэнка і Уладзімір Пуцін сустрэліся ў чацвер на Валааме, відэакадры сустрэчы апублікавала прэс-служба Крамля.
Прэзідэнты дзвюх краін наведалі Спаса-Праабражэнскі Валаамскі мужчынскі манастыр, пабывалі на службе ў царкве Смаленскай іконы Божай Маці на Смаленскім скіце, паведамілі ў Крамлі.
Разам з беларускім лідэрам на Валаам прыехаў і ягоны малодшы сын Мікалай Лукашэнка. Размаўляючы са святарамі, беларускі лідэр пажартаваў аб мясцовым надвор'і:
"Думалі, прыедзем, астынем тут у холадзе, а тут спякота большая, чым у нас", - сказаў Лукашэнка.
"Вада 25 градусаў зараз. Цяплей, чым у Чорным моры", - адрэагаваў святар.
У чацвер прэзідэнт Беларусі прыляцеў у Санкт-Пецярбург з працоўным візітам.
Паводле звестак прэс-службы беларускага лідэра, бакі абмяркуюць актуальныя пытанні ў развіцці беларуска-расійскіх адносін, прасоўванне саюзных праектаў, тэматыку рэгіянальнай бяспекі і міжнародны парадак дня.
Кіраўнікі дзяржаў сустракаюцца на гэтай расійскай выспе не ўпершыню. Так, год таму яны таксама наведалі Валаам, дзе разам схадзілі ў Спаса-Праабражэнскі Сабор.
Акрамя таго - таксама ў ліпені, але ўжо 2019 года - Лукашэнка і Пуцін. разам наведвалі Спаса-Праабражэнскі Валаамскі стаўрапігіяльны мужчынскі манастыр, пабывалі на службе, убачылі царкву Смаленскай іконы Божай Маці і капліцу Царскіх пакутнікаў, былі і на востраве Светлым.
Тады разам з беларускім лідэрам, які ўпершыню быў на востраве ў Ладажскім возеры, прыехаў і яго малодшы сын Мікалай.
>>> Хочаце яшчэ больш актуальных і цікавых навін – падпісвайцеся на Telegram-канал Sputnik Беларусь, чытайце нас у Дзэн, а таксама сачыце за намі ў сацсетках "Одноклассники" і "ВКонтакте"