МІНСК, 2 кас – Sputnik. Беларускі бок прапрацоўвае пытанне прыцягнення расійскага экспартнага крэдыту на будаўніцтва ў рэспубліцы энергакрыніц на мясцовых відах паліва, расказаў журналістам намеснік старшыні Дзяржстандарта – дырэктар Дэпартамента па энергаэфектыўнасці Віталь Крэцкі перад пасяджэннем прэзідыума Саўміна ў сераду, перадае карэспандэнт Sputnik.
Ён адзначыў, што пытанні замяшчэння імпартных вуглевадародаў і ўключэння ў паліўны баланс мясцовых энергарэсурсаў застаюцца актуальнымі да канца бягучай і наступнай пяцігодак.
"Сёння ў нас у краіне больш за 10 тыс энергакрыніц. І больш за палову з іх ужо пераведзены на ўласныя энергарэсурсы. Штогадовае выкарыстанне ў краіне мясцовых відаў паліва дазваляе замяшчаць каля 2,8 млрд кубаметраў газу ў год на вытворчасць цеплавой энергіі", - праінфармаваў Крэцкі.
У гэтым годзе ў Беларусі пабудавалі 45 энергакрыніц з 95 запланаваных. У 2025-м плануецца пабудаваць 32 энергакрыніцы на мясцовых відах паліва.
"Асноўная мэта будаўніцтва такіх энергакрыніц – не толькі замяшчэнне прыроднага газу, але і зніжэнне сабекошту цеплавой энергіі. На гэтых аб'ектах сабекошт адной адзінкі цяпла на 16-19% ніжэй, чым у выпадку з крыніцай, якая працуе на прыродным газе", - растлумачыў дырэктар дэпартамента.
Расійскі крэдыт
Адказваючы на пытанне карэспандэнта Sputnik аб прыцягненні сродкаў на будаўніцтва такіх аб’ектаў у рэспубліцы з іншых крыніц (у прыватнасці, з Расіі і Кітая), Віталь Крэцкі сказаў, што сумесна з Мінэнерга Расіі быў заключаны адпаведны мемарандум.
"Сёння ў прапрацоўцы прыцягненне расійскага экспартнага крэдыту на будаўніцтва гэтых аб’ектаў. Кітайскія партнёры пакуль яшчэ адказу не далі, але ў перспектыве дэпартамент плануе зрабіць інвестпраект і яго прадэманстраваць для краін-удзельніц ШАС у рамках заключанай стратэгіі энергетычнага супрацоўніцтва, якая была адобрана кіраўнікамі дзяржаў у ліпені бягучага года", - сказаў на заканчэнне ён.
Хочаце яшчэ больш актуальных і цікавых навін – падпісвайцеся на Telegram-канал Sputnik Беларусь, чытайце нас у Дзэн, а таксама сачыце за намі ў сацсетках "Одноклассники" і "ВКонтакте"