МІНСК, 7 кас – Sputnik. Крэдытная лінія, якую раней выдзеліў Беларусі расійскі бок на сумесныя праекты па імпартазамяшчэнні, можа вырасці са 105 да 200 млрд расійскіх рублёў (3,6 – 6,9 млрд беларускіх), паведаміў журналістам пасол рэспублікі ў Расіі Аляксандр Рагожнік.
"Сёння на разглядзе расійскага боку сем праектаў на агульную суму больш за 70 млрд рублёў (расійскіх - Sputnik). І мы гэтую працу не спыняем", - цытуе пасла БелТА.
Раней паведамлялася, што Беларусь хоча пашырыць крэдытную лінію РФ, але канкрэтныя лічбы не называліся. Па ўжо зацверджанай праграме запушчаны ў работу 27 праектаў у авіябудаванні, электроніцы, станкабудаванні і іншых сферах.
Адзін з самых вядомых праектаў – вытворчасць саюзнага самалёта "Асвей" на базе 558-га рамонтнага завода. Гэта будзе цывільная машына, але рабіць яе вырашылі на прадпрыемстве абароннага комплексу.
Як паведаміў нядаўна старшыня Дзяржаўнага ваенна-прамысловага камітэта Беларусі Дзмітрый Пантус, Расія забяспечвае размяшчэнне фіксаванага заказу на выраб у Беларусі не менш як 178 фюзеляжаў самалёта, а таксама не менш як 89 паветраных суднаў.
Адзін такі самалёт зможа перавозіць 19 пасажыраў на мясцовых і рэгіянальных лініях. Магчыма і перавозка грузаў. Фактычна гэта будзе замена L-410, якія раней вырабляліся ў Чэхаславакіі, а затым у Расіі.
Хочаце яшчэ больш актуальных і цікавых навін – падпісвайцеся на Telegram-канал Sputnik Беларусь, чытайце нас у Дзэн, а таксама сачыце за намі ў сацсетках "Одноклассники" і "ВКонтакте"