МІНСК, 5 ліс – Sputnik. Саюзнае будаўніцтва Беларусі і Расіі дапамагае супрацьстаяць сучасным выклікам і пагрозам, паведаміў прэм’ер-міністр рэспублікі Раман Галоўчанка на пасяджэнні саюзнага Саўміна ў Мінску, перадае карэспандэнт Sputnik.
Ён нагадаў, што цяперашняе пасяджэнне праходзіць напярэдадні знакавай даты – 25-годдзя падпісання дагавора аб стварэнні Саюзнай дзяржавы (8 снежня 1999 года).
"За гады саюзнага будаўніцтва намі створана, я лічу, без перабольшання, унікальная інтэграцыйная мадэль, у рамках якой пры поўным захаванні суверэнітэту Беларусі і Расіі сфарміраваны неабходныя ўмовы для забеспячэння камфортных умоў жыцця і работы грамадзян дзвюх дзяржаў і бізнесу, а таксама далейшага развіцця эканамічнага супрацоўніцтва", - сказаў у пачатку свайго выступлення кіраўнік беларускага ўрада.
Добрыя вынікі
Прэм’ер падкрэсліў, што 25 гадоў таму кіраўнікі дзвюх краін зрабілі правільны выбар, і зараз саюзнае будаўніцтва дапамагае Беларусі і Расіі эфектыўна супрацьстаяць сучасным выклікам і пагрозам, стварае неабходныя ўмовы для далейшага развіцця, павышэння дабрабыту і ўзроўню жыцця народаў.
"І гэта не пустыя, не парадныя словы", - канстатаваў ён.
Пасля чаго дадаў, што да юбілейнай даты Беларусь і РФ падыходзяць з добрымі эканамічнымі вынікамі. У параўнанні з 1999 годам, калі была створана СД, аб’ём валавога ўнутранага прадукту Беларусі вырас больш як у 6 разоў, у Расіі – у 10.
"І, нягледзячы на няпростыя знешнія ўмовы, цесная інтэграцыя дае магчымасць захоўваць гэту пазітыўную дынаміку. За восем месяцаў бягучага года аб’ём ВУП у абедзвюх краінах перасягнуў 4%. З кожным годам паляпшаюцца вынікі ўзаемнага гандлю", - прывёў лічбы прэм’ер-міністр Беларусі.
Ён таксама паведаміў, што на пасяджэнні будуць разгледжаны пытанні стварэння камфортных тарыфаў для паслуг сувязі і перадачы даных у Саюзнай дзяржаве – гэта канкрэтнае даручэнне прэзідэнтаў дзвюх краін. Акрамя таго, прэм’еры абмяркуюць абарону праў спажыўцоў, развіццё прыгарадных чыгуначных зносін паміж рэгіёнамі Беларусі і РФ, агульнай інфармацыйнай прасторы, навукова-тэхналагічнага развіцця.
Таксама саюзны Саўмін абмяркуе план правядзення ў 2025 годзе сумесных мерапрыемстваў датчына святкавання 80-годдзя Перамогі ў Вялікай Айчыннай вайне. Акрамя таго, у парадак дня ўключаны пытанні рэфармавання СМІ Саюзнай дзяржавы.
Рашэнні Саўміна СД будуць вынесены на зацвярджэнне юбілейнага пасяджэння Вышэйшага Дзяржсавета, якое адбудзецца ў снежні.
Хочаце яшчэ больш актуальных і цікавых навін – падпісвайцеся на Telegram-канал Sputnik Беларусь, чытайце нас у Дзэн, а таксама сачыце за намі ў сацсетках "Одноклассники" і "ВКонтакте"