МІНСК, 7 ліс – Sputnik. Мітынг з нагоды чарговай гадавіны Кастрычніцкай рэвалюцыі прайшоў у Мінску на плошчы Незалежнасці, перадае карэспандэнт Sputnik.
У мерапрыемстве прынялі ўдзел некалькі тысяч чалавек: прадстаўнікі працоўных калектываў, прафсаюзаў, грамадскіх арганізацый, дэпутаты, дыпламаты, а таксама ганаровыя замежныя госці.
Першы сакратар Цэнтральнага камітэта Камуністычнай партыі Беларусі Сяргей Сыранкоў адзначыў, што 107 гадоў таму адбылася "найвялікшая з усіх падзей у гісторыі".
"Вялікая Кастрычніцкая сацыялістычная рэвалюцыя стала пераломнай падзеяй не толькі ў жыцці нашай Айчыны, але і ўсяго чалавецтва. Упершыню ў гісторыі ўсяго свету ўлада перайшла ад вузкай элітарнай групы да партыі бальшавікоў", - сказаў ён.
Паводле яго слоў, кастрычнік 1917-га сустрэлі з натхненнем практычна ва ўсіх кутках зямлі, бо на змену ідэалогіі капіталізму прыйшлі прынцыпы сацыяльнай справядлівасці, сапраўднага народаўладдзя і гуманізму.
Першы сакратар КПБ асабліва падкрэсліў ролю Вялікага Кастрычніка для беларускага народа.
"Калі царскія і польскія памешчыкі і паны глядзелі пагардліва на звычайнага беларуса і бачылі ў іх бяспраўную рабочую сілу і пляваць хацелі на іх лёс, то бальшавікі паставілі перад сабой задачу сацыяльнага і нацыянальнага вызвалення ўсіх жыхароў беларускага краю", - падкрэсліў Сыранкоў.
Ён нагадаў, што праз месяц пасля рэвалюцыі быў арганізаваны Усебеларускі з’езд, у якім прынялі ўдзел 1 872 дэлегаты. З’езд пастанавіў стварыць беларускую дзяржаву на савецкай аснове ў цесным саюзе з савецкай Расіяй.
"У адрозненне ад палітыкі белапольскіх паноў і белагвардзейскіх памешчыкаў, кайзераўскіх юнкераў, беларусы атрымалі сваю дзяржаўнасць – не ў нейкіх дэкларацыях, статутных граматах або іншых пустых паперках – а ў рэальнасці палітычнага жыцця народа. З 1 студзеня 1919 года і па сённяшні дзень бесперапынна існуе нашая нацыянальная дзяржаўнасць на савецкай аснове, за што беларускі народ дзякуе камуністам", - падсумаваў кіраўнік камуністычнай партыі.
Дэпутат Дзярждумы РФ Казбек Тайсаеў, які прысутнічаў на мітынгу, у сваю чаргу павіншаваў беларусаў са святам 7 лістапада ад імя КПРФ і яе лідара Генадзя Зюганава. Расійскі парламентарый таксама выказаў падзяку прэзідэнту Беларусі Аляксандру Лукашэнку, які ў 1995 прыняў рашэнне аб аднаўленні святкавання Дня Кастрычніцкай рэвалюцыі.
"Сёння Беларусь з’яўляецца адзінай краінай, якая поўнасцю рэалізуе ідэі Вялікага Кастрычніка. Усё на карысць чалавека працы. Сёння беларусы маюць магчымасць годна жыць і працаваць на сваёй зямлі", - сказаў Тайсаеў.
Хочаце яшчэ больш актуальных і цікавых навін – падпісвайцеся на Telegram-канал Sputnik Беларусь, чытайце нас у Дзэн, а таксама сачыце за намі ў сацсетках "Одноклассники" і "ВКонтакте"