МІНСК, 26 сту – Sputnik. Выбарчыя ўчасткі для галасавання ў асноўны дзень прэзідэнцкіх выбараў адчыніліся ў Беларусі, яны будуць працаваць з 8:00 да 20:00 без перапынку.
У адпаведнасці з заканадаўствам, у Беларусі праводзіцца датэрміновае галасаванне, таксама выбаршчыкі галасуюць у асноўны дзень. У рамках гэтай электаральнай кампаніі датэрміновае галасаванне пачалося 21 студзеня і працягвалася пяць дзён – да 25 студзеня, уключна.
У 8:00 сёння па ўсёй краіне адчыніліся больш за 5,3 тыс выбарчых участкаў. Больш за ўсё іх створана ў Гомельскай і Мінскай абласцях (больш за 920 і амаль 900, адпаведна), больш за 860 участкаў для галасавання адкрыта ў Брэсцкай вобласці, больш за 700 – у беларускай сталіцы, больш за 680 – у Магілёўскай вобласці, больш за 670 – у Віцебскай вобласці і больш за 580 – у Гродзенскай.
За ходам прэзідэнцкіх выбараў назірае некалькі місій міжнародных назіральнікаў – ад СНД, МПА СНД, ШАС, ПА АДКБ. Усяго больш за 470 міжнародных назіральнікаў, з якіх больш за 100 – незалежныя, а таксама 35 – ад выбарчых органаў замежных дзяржаў.
У выбарчыя лісты ўключана больш за 6,9 млн грамадзян Беларусі, якія маюць выбарчае права.
Па выніках датэрміновага галасавання ў краіне прыйшлі на выбарчыя ўчасткі 41,81% выбаршчыкаў.
У 20:00 участкі зачыняцца і выбарчыя камісіі ў прысутнасці назіральнікаў адкрыюць скрыні для галасавання і пачнуць падлік бюлетэняў. Вынікі галасавання ЦВК плануе аб’явіць прыкладна ў 2:30 ночы.
Хочаце яшчэ больш актуальных і цікавых навін – падпісвайцеся на Telegram-канал Sputnik Беларусь, чытайце нас у Дзэн, а таксама сачыце за намі ў сацсетках "Одноклассники" і "ВКонтакте"