МІНСК, 28 сту – Sputnik. Цэнтрвыбаркам рыхтуецца да правядзення пасяджэння па выніках прэзідэнцкіх выбараў, скарг пасля асноўнага дня галасавання камісія не атрымлівала, паведаміў у аўторак кіраўнік ЦВК Ігар Карпенка, перадае карэспандэнт Sputnik.
"Не, не паступалі", - заявіў ён журналістам, адказваючы на адпаведнае пытанне.
Паводле яго слоў, сёння ЦВК пачынае прыёмку пратаколаў ад тэрытарыяльных камісій.
"Мы рыхтуем выніковае пасяджэнне, дзе падвядзем канчатковыя вынікі, і з моманту публікацыі пастановы ЦВК яны будуць афіцыйна зацверджаны", - сказаў Карпенка.
Плануецца, што гэтае пасяджэнне Цэнтрвыбаркама адбудзецца 3 лютага.
Карпенка таксама адзначыў, што палітыка, якая праводзіцца ЦВК, не змянілася.
"Мы працягваем палітыку адкрытасці, выніковае пасяджэнне будзе праходзіць у рэжыме трансляцыі анлайн на сайце ЦВК. (...) Мы будзем займацца абавязкамі, якія ўскладзены на нас Выбарчым кодэксам. Гэта прававая асвета грамадзян, сустрэчы ў працоўных калектывах", - падкрэсліў кіраўнік ЦВК.
Ён таксама расказаў, што правёў шмат сустрэч з назіральнікамі, якія прыехалі на прэзідэнцкія выбары ў Беларусь. Паводле яго слоў, усе яны адзначалі адкрытасць і празрыстасць прэзідэнцкіх выбараў.
Карпенка нагадаў, што ўсяго на выбарах працавалі амаль 500 міжнародных назіральнікаў з больш як 50 краін.
Выбары ў Беларусі
Асноўны дзень галасавання на прэзідэнцкіх выбарах у рэспубліцы адбыўся ў нядзелю, 26 студзеня. Па даных ЦВК, яўка на выбарах склала 85,69%.
Пасля апрацоўкі ўсіх бюлетэняў дзеючы кіраўнік дзяржавы набраў 86,82% галасоў выбаршчыкаў, Сяргей Сыранкоў (КПБ) – 3,21%, Алег Гайдукевіч (ЛДПБ) – 2,02%, Ганна Канапацкая (самавылучэнец) – 1,86%, Аляксандр Хіжняк (РППС) – 1,74%, супраць усіх прагаласавалі 3,6% грамадзян.
Хочаце яшчэ больш актуальных і цікавых навін – падпісвайцеся на Telegram-канал Sputnik Беларусь, чытайце нас у Дзэн, а таксама сачыце за намі ў сацсетках "Одноклассники" і "ВКонтакте"