МІНСК, 7 лют – Sputnik. Прэзідэнт Беларусі Аляксандр Лукашэнка заявіў аб неабходнасці павялічыць тавараабарот з Рэспублікай Башкортастан, перадае карэспандэнт Sputnik.
Беларускі лідар у пятніцу праводзіць сустрэчу з кіраўніком Рэспублікі Башкортастан Радыем Хабіравым. Бакі абмяркуюць актуальныя пытанні і перспектывы гандлёва-эканамічнага супрацоўніцтва Мінка і Уфы.
"Мы крыху зменшылі тавараабарот у мінулым годзе (...) 5-6% у тавараабароце", - сказаў Лукашэнка.
Паводле яго слоў, трэба нарасціць лічбы тавараабароту, якія складаюць на гэты момант каля 315 млн долараў.
"Нам вельмі выгадна працаваць з Башкортастанам", - звярнуў увагу прэзідэнт.
У бакоў ужо ёсць шэраг сумесных тэхналагічных праектаў, у прыватнасці па зборцы трактароў, тралейбусаў, і іх неабходна развіваць. Мінск гатоў супрацоўнічаць у вытворчасці тэхнікі на базе беларускіх тэхналогій, у прыватнасці, аўтатэхнікі, трамваяў. Беларускі бок таксама плануе адкрыць ва Уфе вытворча-сэрвісны цэнтр дарожна-будаўнічай і іншай тэхнікі "Амкадор".
Лукашэнка таксама адзначыў, што Беларусі і Башкірыі мэтазгодна развіваць супрацоўніцтва ў частцы вытворчасці беспілотнікаў, у тым ліку апаратаў для выкарыстання ў ваеннай сферы.
"Калі патрэбны будуць не толькі нашы тавары, але і тэхналогіі падыдуць вам, – з вялікім задавальненнем будзем працаваць", - падкрэсліў ён, растлумачыўшы, што ўжо ёсць пэўны вопыт і напрацоўкі.
Прэзідэнт мяркуе, што трэба рухацца ў гэтым напрамку.
Таксама беларускі бок гатоў пастаўляць у гэты рэгіён Расіі айчынныя прадукты, тавары лёгкай прамысловасці.
У сваю чаргу Хабіраў падкрэсліў, што кожны год Башкортастан павялічвае аб'ёмы імпарту з Беларусі беларускіх прадуктаў.
У сустрэчы бяруць удзел Надзвычайны і Паўнамоцны пасол Расіі Барыс Грызлоў, прэм’ер-міністр урада Башкортастан Андрэй Назараў, а таксама кіраўнік МАРГ Беларусі Артур Карповіч і кіраўнік МЗС Максім Рыжанкоў.
Хочаце яшчэ больш актуальных і цікавых навін – падпісвайцеся на Telegram-канал Sputnik Беларусь, чытайце нас у Дзэн, а таксама сачыце за намі ў сацсетках "Одноклассники" і "ВКонтакте"