МІНСК, 5 мая – Sputnik. Больш за 1,4 тысячы аграэкасядзіб налічваецца цяпер у Беларусі, паведаміў на прэс-канферэнцыі ў панядзелак кансультант Дэпартамента па турызме міністэрства спорту і турызму Аляксандр Крэчатаў.
"Цяпер у Беларусі аграэкатурызмам займаюцца больш як 1,4 тысячы аграэкасядзіб. Для занятку гэтым відам дзейнасці патрэбна наяўнасць жылога дома ў сельскай мясцовасці з пэўнай колькасцю жылых пакояў (іх павінна быць не больш за 10), пэўны зямельны ўчастак мэтавага прызначэння і выконвацца шэраг пэўных умоў", - паведаміў спецыяліст.
Паводле яго інфармацыі, аграэкатурызм у рэспубліцы дастаткова запатрабаваны.
"Па даных мінулага года, больш за 427 тысяч чалавек наведалі беларускія аграэкасядзібы, у асноўным гэта грамадзяне Беларусі, але ёсць і дастаткова вялікая колькасць замежнікаў, якія наведалі нашы аграэкасядзібы", - паведаміў Крэчатаў.
Кансультант дэпартамента таксама паведаміў, што ў сядзібах праводзіцца дастаткова шмат мерапрыемстваў, звязаных з народнымі традыцыямі, промысламі, арганізуюцца майстар-класы. Ёсць і такія аграэкасядзібы, якія спецыялізуюцца і на ваенна-патрыятычнай тэматыцы.
"Аграэкасядзібы з’яўляюцца ўнікальным па сваёй сутнасці праектам, таму што гэта сапраўды магчымасць азнаёміцца з нацыянальнымі традыцыямі, прасякнуцца менавіта сельскім побытам і, вядома ж, адпачыць", - дадаў спецыяліст.
Дырэктар Нацыянальнага агенцтва па турызме Дзмітрый Марозаў у сваю чаргу адзначыў, што аграэкасядзібы ёсць ва ўсіх рэгіёнах Беларусі.
"Гэта лепшы шлях, каб прасякнуцца каларытам розных рэгіёнаў нашай краіны, тым больш што аграэкатурызм цесна пераплятаецца з гастранамічным турызмам, паколькі, як правіла, менавіта ў аграсядзібах можна пакаштаваць стравы рэгіянальнай нацыянальнай кухні. Таксама гэта пункты для арганізацыі мясцовых экскурсій", - сказаў кіраўнік агенцтва.
Хочаце яшчэ больш актуальных і цікавых навін – падпісвайцеся на Telegram-канал Sputnik Беларусь, чытайце нас у Дзэн, а таксама сачыце за намі ў сацсетках "Одноклассники" і "ВКонтакте"