Патрыярх Кірыл узнагародзіў мітрапаліта Веніяміна Ордэнам Серафіма Сароўскага

ПОЛАЦК, 5 чэр – Sputnik. Найсвяцейшы Патрыярх Кірыл узнагародзіў прадстаяцеля Беларускай праваслаўнай царквы мітрапаліта Мінскага і Заслаўскага Веніяміна ордэнам РПЦ Серафіма Сароўскага Першай ступені, перадае карэспандэнт Sputnik.

Прадстаяцель РПЦ знаходзіцца з першасвяціцельскім візітам у Беларусі. Ён прымае ўдзел ва ўрачыстасцях з нагоды 900-годдзя Свята-Еўфрасіннеўскага жаночага манастыра ў Полацку.

Найсвяцейшы патрыярх узначаліў богаслужэнне ў Крыжаўзвіжанскім храме манастыра, пасля чаго ўручыў узнагароды РПЦ шэрагу беларускіх свяшчэннікаў і чыноўнікаў. У прыватнасці, узнагароды ўручаны старшыні Віцебскага аблвыканкама Аляксандру Субоціну, упаўнаважанаму па справах рэлігій і нацыянальнасцей Аляксандру Румаку.

Патрыярх таксама падарыў Крыжаўзвіжанскаму храму ікону Дзівееўскага манастыра.

На богаслужэнні і ўрачыстасцях у Полацку прысутнічала віцэ-прэм’ер урада Беларусі Наталля Пяткевіч, якая зачытала прывітанне прэзідэнта Беларусі Аляксандра Лукашэнкі, дзяржсакратар Саюзнай дзяржавы Сяргей Глазьеў, Надзвычайны і паўнамоцны пасол Расіі ў Беларусі Барыс Грызлоў.

Выступаючы пасля богаслужэння, патрыярх Кірыл адзначыў, што жыццё святой Еўфрасінні Полацкай з’яўляецца прыкладам таго, як "можа самая вялікая чалавечая дабрадзейнасць – святасць – спалучацца з мудрым праўленнем".

Ён таксама адзначыў важнасць захавання міру, узаемаразумення паміж краінамі і народамі.

У сваю чаргу мітрапаліт Веніямін падзякаваў патрыярху за яго першасвяціцельскі візіт у Беларусь, у Полацкі манастыр, і адзначыў дапамогу і ўклад расійскага боку ў рэстаўрацыю храма, дзе захаваліся фрэскі XII стагоддзя.