МІНСК, 10 ліп – Sputnik. Вядомы беларускі фотажурналіст і дакументаліст Юрый Іваноў прэзентаваў у Мінску новую выставу, перадае карэспандэнт Sputnik.
Работы фотажурналіста размясціліся на другім паверсе ў Цэнтры даследаванняў беларускай культуры, мовы і літаратуры НАН Беларусі. Экспазіцыя аб’ядноўвае тры тэмы: пра ветэранаў Вялікай Айчыннай вайны, "Партрэты сяброў" і "Нашы будні". Тут дэманструюцца фатаграфіі з 1962 года і па сённяшні дзень.
"Партрэты сяброў" – гэта 75 здымкаў вядомых людзей Беларусі: артыстаў, пісьменнікаў, мастакоў, урачоў. Кожную работу суправаджае афарызм, які належыць чалавеку, адлюстраванаму на фота.
"Мала таго, што тут ёсць партрэты, але я яшчэ дадаў да іх афарызмы. Напрыклад, дырыжор Таццяна Каламійцава ў свой час сказала: "Я не магу быць побач з музыкай – я павінна быць у ёй, інакш усё бессэнсоўна". А гэта здымак 1965 года, на ім Іван Паўлавіч Мележ, з якім я быў знаёмы. Яго словы я знайшоў у інтэрнэце: "Няма горшага за той суд, якім судзіш сябе сам", - распавёў Іваноў.
У выставу "Нашы будні" ўвайшлі калажы аб дзейнасці Цэнтра даследаванняў беларускай культуры, мовы і літаратуры НАН Беларусі, дзе працуе Іваноў. Ідэю стварыць такую экспазіцыю фотажурналісту прапанаваў дырэктар цэнтра Аляксандр Лакатко.
Выстава Юрыя Іванова
© Sputnik
"Ідэя была такая нечаканая. Дырэктар нашага цэнтра, акадэмік Аляксандр Іванавіч Лакатко, неяк паглядзеў – у мяне на другім паверсе ёсць кабінет – і кажа: "Юрый Сяргеевіч, нейкі калідор – пустыя сцены. Вось як бы яго запоўніць", - адзначыў субяседнік.
Паводле яго слоў, так за некалькі гадоў з задумкі атрымаўся паўнацэнны выставачны праект, які ў тым ліку знайшоў падтрымку ў прэзідыуме НАН.
Яшчэ адна тэма выставы прысвечана ветэранам Вялікай Айчыннай, у якую ўвайшлі 28 фатаграфій. Адна з іх – "Вішнёвы снег Перамогі" – была зроблена ў Брэсцкай крэпасці ў 1984 годзе.
"Я быў у Брэсце і ўбачыў квітнеючы вішнёвы сад – вішнёвыя пялёсткі сыпаліся з дрэў. Я прыехаў у мемарыяльны комплекс "Брэсцкая крэпасць" і папрасіў дырэктара: "Дайце мне некалькі ветэранаў". Знайшлі машыну і гэтыя 6 ветэранаў прайшлі праз гэты падаючы вішнёвы снег", - падзяліўся фатограф.
Наведвальнікі на выставе Юрыя Іванова
© Sputnik
Госці, якія прысутнічалі на адкрыцці фотавыставы, адзначылі глыбіню работ і бясспрэчны талент Іванова. Многія выказалі меркаванне, што гэтую экспазіцыю трэба паказаць і ў іншых гарадах рэспублікі.
"Я як рэжысёр бачу, як, пранікаючы ў сутнасць адлюстраванага, ён (Юрый Іваноў - Sputnik) набліжаецца да той тайны – разгадаць таямніцу чалавека па Дастаеўскаму. Гэтую выставу трэба ў абавязковым парадку максімальна правесці па Беларусі і па-за (ёй - Sputnik), таму што гэта партрэт калектыўны нацыі", - адзначыў рэжысёр Валерый Аніс.
Усе жадаючыя могуць пазнаёміцца з работамі Юрыя Іванова па адрасе: вул. Сурганава, 1, корпус 2, уваход вольны.
Хочаце яшчэ больш актуальных і цікавых навін – падпісвайцеся на Telegram-канал Sputnik Беларусь, чытайце нас у Дзэн, а таксама сачыце за намі ў сацсетках "Одноклассники" і "ВКонтакте"