МІНСК, 13 вер – Sputnik. Кіраўніцтва Арганізацыі Аб’яднаных Нацый і Еўрасаюза павінны даць ацэнку дзеянням Варшавы па закрыцці меж з Беларуссю, заявіў часовы павераны ў справах Беларусі пры ААН Арцём Тозік на пасяджэнні Савета бяспекі арганізацыі.
Ён нагадаў, што рух на мяжы з Польшчай спынены, няма чыгуначных і аўтамабільных зносін. Па словах часовага паверанага, такія рашэнні Варшавы з’яўляюцца беспадстаўнымі і антынароднымі.
"Такія меры з’яўляюцца працягам курсу на падрыў адносін з суседнімі краінамі і садзейнічаюць далейшай эскалацыі напружанасці ў рэгіёне, ствараючы рызыкі для стабільнасці і прадказальнасці ў міжнародных адносінах. Кіраўніцтва ААН і Еўрапейскага Саюза павінны даць прынцыповую ацэнку такім дзеянням. Заклікаем Савет Бяспекі зірнуць на гэтыя дзеянні і належным чынам адрэагаваць", - сказаў Тозік.
Што адбылося?
Рашэнне аб закрыцці мяжы набыло моц у ноч на 12 верасня. Прычынай у Варшаве назвалі беларуска-расійскія вучэнні "Захад-2025", якія пачаліся 12 верасня і завершацца 16 верасня. У той жа час у Польшчы, Літве і Латвіі разгарнулі серыю вучэнняў, якія працягнуцца да канца кастрычніка.
Пакуль няма дакладнай інфармацыі, на які тэрмін уводзяцца абмежаванні, аднак кіраўнік МУС Польшчы Марчын Кервінскі растлумачыў, што меры будуць мець часовы характар.
На гэты момант выехаць з Беларусі ў краіны ЕС можна праз тры пункты пропуску. На літоўскім напрамку – гэта ПП "Каменны Лог" і "Беняконі", на мяжы з Латвіяй "Грыгароўшчына".
Акрамя таго, ёсць магчымасць вылецець праз трэція краіны рэйсамі з Нацыянальнага аэрапорта "Мінск".
Хочаце яшчэ больш актуальных і цікавых навін – падпісвайцеся на Telegram-канал Sputnik Беларусь, чытайце нас у Дзэн, а таксама сачыце за намі ў сацсетках "Одноклассники" і "ВКонтакте"