МІНСК, 13 вер – Sputnik. Кінастудыі "Ленфильм" і "Беларусьфільм" падпісалі пагадненне аб супрацоўніцтве, паведамілі ў расійскай кінакампаніі.
Удакладняецца, што дакумент быў падпісаны 12 верасня ў рамках ХІ Санкт-Пецярбургскага міжнароднага форуму аб’яднаных культур.
"(…) адбылося падпісанне двух дагавораў аб супрацоўніцтве паміж кінастудыямі "Ленфильм", "Лендок" і "Беларусьфільм", - гаворыцца ў паведамленні.
З расійскага боку дагаворы падпісалі дырэктар кінастудыі "Ленфильм" Надзея Андрушчанка і гендырэктар "Лендока" Аляксей Цяльноў, з беларускага – гендырэктар "Беларусьфільма" Дзмітрый Сямёнаў.
Гэтыя дакументы прадугледжваюць сумесную вытворчасць фільмаў, а таксама абмен тэхналогіямі і выкарыстанне вытворчых магутнасцей.
"Беларусьфільм" і "Ленфильм" звязваюць глыбокія гістарычныя карані, актыўнае сучаснае супрацоўніцтва і агульныя творчыя мэты", - прыведзены ў паведамленні словы Андрушчанкі.
Яна адзначыла, што партнёрства дзвюх кінастудый не толькі выгаднае ў плане эканомікі, але і садзейнічае захаванню і развіццю кінематаграфічных традыцый Расіі і Беларусі.
"Мы і "Лендок" падпісваем пагадненне з "Беларусьфільмам" працягваючы традыцыі і адкрываючы новую старонку супрацоўніцтва і агульнага развіцця", - заявіла дырэктар "Ленфильма".
У паведамленні ўдакладняецца, што бакі будуць развіваць сумесную вытворчасць як гульнявога, так і дакументальнага кіно.
“Гэта не проста падпісанне пагаднення, гэта ўжо першы важны этап для далейшага супрацоўніцтва і руху да сумеснай прадукцыі. Безумоўна, у нас агульная гісторыя, зразумелыя нам традыцыі, зразумелыя нам каштоўнасці. І, канешне, мы ўсе гаворым на адной мове, на мове кінематографа. Мове, якая нас аб’ядноўвае, збліжае. Мы ўсё робім для таго, каб у нас атрымалася якаснае кіно, якое будзе радаваць гледача як на тэрыторыі Рэспублікі Беларусь, так і на тэрыторыі Расійскай Федэрацыі", - адзначыў гендырэктар "Беларусьфільма" Дзмітрый Сямёнаў.
Хочаце яшчэ больш актуальных і цікавых навін – падпісвайцеся на Telegram-канал Sputnik Беларусь, чытайце нас у Дзэн, а таксама сачыце за намі ў сацсетках "Одноклассники" і "ВКонтакте"