МІНСК, 17 вер – Sputnik. Гісторыя не аднойчы правярала Беларусь і Расію суровымі выпрабаваннямі; расіянам як нікому зразумелы гістарычны кантэкст дзяржаўнага свята – Дня народнага адзінства, які адзначаецца ў Беларусі, заявіў Надзвычайны і Паўнамоцны Пасол РФ Барыс Грызлоў.
17 верасня Беларусь адзначае дзяржаўнае свята – Дзень народнага адзінства. Ён прымеркаваны да гадавіны пачатку ўз’яднання Заходняй Беларусі і БССР. У верасні 1939 года Чырвоная армія перайшла мяжу з Польшчай, вынікам гэтага паходу стала далучэнне Заходняй Беларусі да БССР.
"Гісторыя не раз правярала нас на трываласць самымі суровымі выпрабаваннямі. Таму мы ведаем сапраўдную цану свабоды і незалежнасці. Расіяне і беларусы заўсёды былі побач: у 1919-1921 гадах разам адбівалі польскую агрэсію, у 1939 годзе дабіліся ўз’яднання беларускага народа", - заявіў расійскі пасол у інтэрв’ю "Российской газете".
Паводле яго слоў, у гады Вялікай Айчыннай беларусы і расіяне разам змагаліся супраць фашыстаў, у адным страі бралі Берлін, а пасля – разам аднаўлялі Савецкі Саюз.
Гістарычны кантэкст
Грызлоў адзначыў, што гістарычны кантэкст і эмацыянальны складальнік Дня народнага адзінства Беларусі зразумелыя і блізкія расіянам.
Менш як праз два месяцы, 4 лістапада, Расія будзе адзначаць свой Дзень народнага адзінства, які быў заснаваны ў памяць аб выратаванні Радзімы ў Смутны час, адзначыў дыпламат.
"Тады, у 1612 годзе, лёс краіны вісеў на валаску. Але ў час, калі Расія стаяла на мяжы страты сваёй незалежнасці, прадстаўнікі ўсіх саслоўяў, нацыянальнасцей і веравызнанняў сталі на абарону Айчыны", - падкрэсліў Грызлоў.
Стратэгічнае партнёрства
Расійскі пасол таксама асабліва адзначыў, што Расія і Беларусь, стаўшы незалежнымі пасля распаду СССР, пайшлі курсам на захаванне і далейшае ўмацаванне двухбаковага супрацоўніцтва. Масква і Мінск будуюць адносіны ў духу раўнапраўнага стратэгічнага партнёрства, што прывяло да стварэння ўнікальнага інтэграцыйнага праекта – Саюзнай дзяржавы, дадаў ён.
Грызлоў падкрэсліў, што нязменную ўзаемную падтрымку дзвюх краін сімвалізуе Дзень яднання народаў Беларусі і Расіі, які адзначаецца 2 красавіка.
Хочаце яшчэ больш актуальных і цікавых навін – падпісвайцеся на Telegram-канал Sputnik Беларусь, чытайце нас у Дзэн, а таксама сачыце за намі ў сацсетках "Одноклассники" і "ВКонтакте"