МІНСК, 30 кас – Sputnik. Польшча адкрые дадатковыя пагранпераходы з Беларуссю "прыкладна ў сярэдзіне лістапада", паведаміў у чацвер прэс-сакратар урада рэспублікі Адам Шлапка.
У аўторак, 28 кастрычніка, прэм’ер-міністр краіны Дональд Туск заявіў, што Варшава гатова адкрыць два пункты пропуску на мяжы з Беларуссю – "Баброўнікі" ("Бераставіца" з беларускага боку) і "Кузня" ("Брузгі"). У сераду прадстаўнік Пагранічнай варты ўдакладніў, што для аднаўлення працы гэтых ПП польскім пагранічнікам і мытнікам спатрэбіцца 48 гадзін.
У чацвер, 30 кастрычніка, міністр унутраных спраў і адміністрацыі Польшчы Марчын Кервіньскі заявіў, што адкрыццё гэтых пунктаў пропуску адкладзена на некалькі тыдняў. Пры гэтым ён падкрэсліў, што рашэнне аб адкрыцці гэтых ПП прынялі, хаця яго рэалізацыя і затрымліваецца.
"Прэм’ер-міністр Польшчы Дональд Туск і прэм’ер-міністр Літвы Інга Ругінене дамовіліся, што Польшча адкрые свае пагранічныя пераходы з Беларуссю прыкладна ў сярэдзіне лістапада", - цытуе Шлапку агенцтва РАР.
Паводле слоў Шлапкі, адкрыць пагранпераходы планавалася раней, "аднак літоўскі бок у размове з прэм’ер-міністрам Тускам узняў пытанне аб напружанасці на сваёй мяжы".
Літва ў ноч на 27 кастрычніка прыпыніла пропуск транспартных сродкаў і асоб праз два астатнія пункты пропуску "Мядзінінкай" ("Каменны Лог") і "Шальчынінкай" ("Беняконі") на мяжы з Беларуссю з фармуліроўкай "на нявызначаны тэрмін". Прэм’ер-міністр Літвы Інга Ругінене пазней паведаміла, што далейшае рашэнне наконт мяжы будзе прынята 29 кастрычніка.
Хочаце яшчэ больш актуальных і цікавых навін – падпісвайцеся на Telegram-канал Sputnik Беларусь, чытайце нас у Дзэн, а таксама сачыце за намі ў сацсетках "Одноклассники" і "ВКонтакте"