МІНСК, 20 сак – Sputnik. Прэзідэнт Беларусі Аляксандр Лукашэнка заявіў, што рэспубліка рыхтуецца заключыць "вялікую здзелку" з ЗША.
Ён пацвердзіў, што прадстаўнікі Вашынгтона, якія ўжо некалькі разоў за апошні час пабывалі ў Беларусі, ад імя прэзідэнта ЗША Дональда Трампа прапанавалі здзелку, у якой будуць адлюстраваны пытанні, што знаходзяцца ў двухбаковым парадку дня.
"Я што, адмаўляцца буду? Для Беларусі гэта важна і для мяне ў тым ліку", - цытуе Лукашэнку БелТА.
Ён таксама паведаміў, што такі ход дзеянняў успрымае нармальна і папрасіў перадаць Трампу аб сваёй згодзе на выпрацоўку палажэнняў пагаднення.
Паводле слоў Лукашэнкі, Мінск абазначыў свае інтарэсы і накіраваў Вашынгтону адпаведныя прапановы. Пры гэтым, як адзначыў беларускі лідар, здзелка прадугледжвае не толькі пытанне гэтак званых палітзняволеных.
Прэзідэнт удакладніў, што нічога не прасіў узамен ў амерыканскага боку, у тым ліку ў дачыненні да адмены санкцый – ЗША самі абазначаюць тыя ці іншыя тэмы.
Паводле яго слоў, ідзе дыялог аб рабоце пасольстваў у абедзвюх краінах, аб ядзерных матэрыялах, якія захоўваюцца ў Беларусі пад кантролем МАГАТЭ. Прэзідэнт удакладніў, што апошняе ўяўляе для ЗША цікавасць у плане нераспаўсюджвання ядзернай зброі.
"Мы рыхтуемся да гэтага вялікага дагавора з амерыканцамі", - падсумаваў Лукашэнка.
У чацвер беларускі лідар правёў сустрэчу з дэлегацыяй ЗША на чале са спецпасланнікам Трампа Джонам Коўлам. У гэты дзень былі памілаваны 250 асуджаных за злачынствы экстрэмісцкай накіраванасці.
Хочаце яшчэ больш актуальных і цікавых навін – падпісвайцеся на Telegram-канал Sputnik Беларусь, MAX і Viber, чытайце нас у Дзэн, а таксама сачыце за намі ў сацсетках "Одноклассники" і "ВКонтакте"