МІНСК, 29 кра – Sputnik. Традыцыйныя стравы народаў свету ў Беларусі знаходзяць асаблівы каларыт. На хлебасольнай зямлі рыхтуюць так, каб хапіла на ўсіх. Гэта вялізныя дранікі, бліны, а зараз яшчэ і хачапуры. Аб новым рэкордзе кулінары з Брэста расказалі ў мультымедыйным прэс-цэнтры Sputnik Беларусь.
Шэф-повар Дома грузінскай кухні з Брэста Гюльнар Садыгава раскрыла невялікі сакрэт нацыянальнай стравы Грузіі. Аказваецца, ёсць вялізная колькасць відаў хачапуры – царскае, імерэцінскае, мегрэльскае… Але ў Кнігу рэкордаў Беларусі трапіла аджарскае. І вось чаму.
"Як правіла, хачапуры круглае. А вось аджарскае мае выгляд лодачкі. Форма сімвалізуе мора. А яечны жаўток – гарачае паўднёвае сонца", - распавяла Садыгава.
У перакладзе з грузінскага хачапуры гэта хлеб з сырам. Для гатавання стравы выкарыстоўваюць асаблівы гатунак сыру – імерэцінскі. Гэта малады сыр з каровінага малака, які мае мяккі саланаваты смак. Ён багаты на кальцый, цынк, вітамін А, што, як лічыцца, надае сілу і даўгалецце.
"Такі сыр мы робім самі. З беларускага малака, якое славіцца сваёй якасцю. Гэта надае асаблівы смак хачапуры", - растлумачыла шэф-повар.
Самае вялікае хачапуры ў свеце зрабілі ў Брэсце
© Photo
Гюльнар прызналася, што першапачаткова не планавала ўстанаўленне рэкорду. Проста яна вырашыла прыгатаваць хачапуры для ўсіх сваіх шматлікіх калег, а каб хапіла на ўсіх – зрабіць яго вялізным. Хачапуры атрымалася 71 см у даўжыню і вагой 4,8 кг.
"Усе здзівіліся памеру. Хтосьці сказаў – гэта рэкорд. Сталі ўдакладняць – сапраўды, такое вялікае хачапуры да нас яшчэ ніхто ў свеце не зрабіў", - адзначыла Садыгава.
Як па-асабліваму назавуць вялізнае хачапуры, кулінары яшчэ не вырашылі. Магчыма, брэсцкі – у гонар горада, дзе быў устаноўлены рэкорд.
Хочаце яшчэ больш актуальных і цікавых навін – падпісвайцеся на Telegram-канал Sputnik Беларусь, MAX і Viber, чытайце нас у Дзэн, а таксама сачыце за намі ў сацсетках "Одноклассники" і "ВКонтакте"