Таемнасць купальскіх песень: "Дзе ты, Купала, ноч начавала?.."


"Сягонне Купалле,
А заўтра Ян,
Пойдзем, дзевачкі,
У зялёны гай.
У зялёным гаі
Начаваць будзем,
Зялёны вяночкі
Віць будзем".

"Ішла Купала сялом, сялом,
Закрыўшы вочкі пяром, пяром
На Йвана Купала.
Закрыўшы вочкі пяром, пяром,
Вітала хлопцаў чалом, чалом
На Йвана Купала.
Вітала хлопцаў чалом, чалом,
Свяціла ночкі агнём, агнём
На Йвана Купала.
Свяціла ночкі агнём, агнём,
Пляла вяночкі шаўком, шаўком
На Йвана Купала…"

"Сядзіць Купалка на плоце,
Уся яе галоўка ў залоце
Да просіць у бога пагоды:
– Ой, дай жа, божа, пагоды
На гэту ночку вясёлу:
Будуць музыкі іграці,
Будуць дзеўкі гуляці,
Малодачкі спяваці…"

"Звала Купала Іллю на йгрышча, то-то-то!
– Хадзі, Іллішча, ка мне на йгрышча, то-то-то!
– Не маю часу, Купалачка, то-то-то!
Гэту ночку мне не спаці, то-то-то!
Трэба жыта ўсяго пільнаваці, то-то-то!.."

"Як улетку на Купалу
Ішлі дзеўкі табуном,
Пілі мядок стаўбуном…
…
Ішлі хлопчыкі граніцаю
Да пілі мёд шкляніцаю…"

"А на Купалле на Яна
Дзевачкі зелле капалі.
Яны капалі, не зналі,
Да караля паслалі.
Кароль зелле не пазнаў,
Да каралевы адаслаў.
Каралева зелле пазнала
I да дзевачак адаслала.
– Гэта, дзевачкі, не зелле,
Гэта ваша вяселле…"

"Ты, Купаленька, рана, рана
Да дзе ты была, рана, рана,
Да што ты рабіла, рана, рана?
– Ды ў бары была, рана, рана,
Я краскі збірала, рана, рана.
– Нашто красачкі, рана, рана?
– Я й вянкі віці, рана, рана…"

"Дзе ты, Купала, ноч начавала:
Ці з Мікітам пад карытам,
Ці з Цімошкам пад лукошкам?
– Не з Мікітам пад карытам,
Не з Цімошкам пад лукошкам, –
Начавала ночку на зялёным лужочку…"

"Купала на Йвана,
А чый лён за балотам?
Купала на Йвана,
За балотам няполаты,
Купала на Йвана.
– Верачкі лён за балотам,
Купала на Йвана.
– А зачым ён не полаты?
Купала на Йвана…
…
– Ні за сім, ні за тым,
Купала на Йвана,
А за доўгім сном,
Купала на Йвана".

"Купальна ночка невялічка,
Да не выспалася дзевачка,
Да ягадкі рвала – драмала,
Перабірала – заснула,
Прыехаў дзеціначка – не чула,
Махнуў хустачкаю – не адмахнуў,
Пакаціў персцянём – не дакаціў,
Злез з коніка – сам пабудзіў!.."
