МІНСК, 19 вер - Sputnik. Беларусы павінны на сабе адчуваць станоўчыя вынікі працы эканомікі, заявіў у чацвер на нарадзе прэзідэнт Беларусі Аляксандр Лукашэнка.
На нарадзе ў прэзідэнта ў чацвер разглядаецца пакет прагнозных дакументаў на наступны год. Сярод тэм для абмеркавання - праца эканомікі ў бягучым годзе, ацэнка вынікаў года і пяцігодкі, праект рэспубліканскага бюджэту і іншыя дакументы.
Як адзначыў Лукашэнка, сярод удзельнікаў нарады не толькі распрацоўшчыкі дакументаў, але і тыя, хто даваў па іх заключэнні альбо мае альтэрнатыўны пункт гледжання.
"Прагноз на бягучы год прымаўся дзеючым складам урада. На леташняй нарадзе я чуў довады, што ён вывераны, абгрунтаваны і пралічаны. Таму мае даручэнні, як пісьмовыя, так і агучаныя публічна, вы ўсё ведаеце - усё запланаванае павінна быць рэалізавана", - адзначыў прэзідэнт, яго словы прывяла БелТА.
Пры гэтым, падкрэсліў прэзідэнт, справа не толькі ў паказчыках эканамічнага развіцця краіны.
"Станоўчыя вынікі працы эканомікі людзі павінны адчуць на сабе - праз пастаяннае павышэнне свайго дабрабыту і ўзроўню якасці жыцця", - дадаў Лукашэнка.
Без эканамічнага росту, упэўнены прэзідэнт, гэтага дамагчыся немагчыма. "Аднак мяне насцярожвае, што ён не толькі сціплы, але і вельмі няўстойлівы. Гэтую тэндэнцыю трэба мяняць", - адзначыў ён.
