18:04 17 верасня 2019
«Радыё Sputnik»
  • USD2.05
  • EUR2.26
  • 100 RUB3.20
Судак

Лепшая рыба – гэта каўбаса? Гатуем смачныя беларускія рыбныя стравы

© Sputnik / Игорь Зарембо
Цiкавосткi
Атрымаць кароткую спасылку
Прыродная сталоўка: гатуем з таго, што пад нагамі (43)
2120

Этнограф Ларыса Мятлеўская распавядае, як займаліся рыбнай лоўляй продкі беларусаў і вучыць гатаваць сапраўдную смакату.

У народзе кажуць: "Каб рыбку з’есці, трэба ў ваду лезці". І гэта нездарма. Нашы продкі вялікую ўвагу надавалі рыбнай лоўлі і былі сапраўднымі майстрамі ў гэтай складанай справе.

Чым лавілі рыбу

Цяпер рыбу ловяць часцей толькі вудамі, але ж рыбалоўныя прылады беларусаў былі вельмі разнастайнымі. Згодна з прынцыпам дзейнасці, яны падзяляліся на невады, сеткі, стаўныя пасткі, рухомыя пасткі, кручковыя снасці і ударныя прылады. Таксама вылучалі зімовыя і летнія рыбалоўныя прылады. Многія з іх зараз можна ўбачыць толькі ў музеях і на старых фотаздымках.

Назвы прылад могуць здзіўляць сучаснікаў, і тым не менш яны гавораць часам самі за сябе. Невады: падвалокі летнія, мутнікі донныя, брэдні, латы і крыгі. Усе яны ўяўляюць сабой адкрытую сеткавую сцяну з адкрытым сеткавым мяшком пасярэдзіне, куды рыбу заганяюць пры дапамозе спецыяльнага шаста – баўтуна. Трапіўшы ў такую прыладу яна быццам адцэджваецца.

Лавілі рыбу і пры даамозе розных пастак – езы, венцяры, мярэжы, бучы. Узімку, рыбу, якая імкнулася да свежай вады з-за недахопу кіслароду ў замёрзлым вадаёме, лавілі ў палонках з дапамогай каробак і скрыпак.

Большасць рыбалоўных прылад сустракаліся па ўсёй Беларусі, але ж некаторыя з іх былі характэрнныя для пэўных рэгіёнаў. Як правіла рыбалоўныя прылады выраблялі самі рыбаловы. З традыцыйных рыбалоўных прылад у сучасным прамысловым рыбалоўстве ўжываюць невады, сеткі, мярэжы, а ў аматарска-спартыўным – вуды, дарожкі, матылі, старажні, перамёты, блісні, падсакі. Папулярнымі сталі спінінгі і новыя тыпы вуд.

І хоць у народзе і кажуць "Няма лепшай рыбкі, як свіная каўбаса", але да страў з рыбы ставяцца з вялікай прыязнасцю. Бяседны стол ніколі не будзе поўным без рыбнай стравы.

Галоўнае правіла пры прыгатаванні рыбныз страў – яна павінна быць абсалютна свежай. Нямал цікавых рэцэптаў ёсць у старажытнай беларускай кухні.

Запяканка з рыбы

Інгрыдыенты:

  • 500 г рыбы (карп, лінь)
  • 500 г бульбы
  • 60-80 г алею
  • 150 г смятаны
  • 1 цыбуліна
  • 1 ст лыжка мукі
  • Соль
  • Молаты чорны перац
  • Зеляніна кропу

Як гатаваць:

Рыбу пачысціць, памыць, парэзаць на кавалкі, пасыпаць соллю, перцам, укачаць у муку і абсмажыць на алеі з абодвух бакоў. Памытую бульбу зварыць, абабраць, змяльчыць на буйной тарцы. Асобна абсмажыць дробна нарэзаную цыбулю.

У жароўню, змазаную алеям, пакласці палову падрыхтаванай бульбы, на яе — кавалкі рыбы, пасыпаць яе цыбуляй, зверху — зноў слой  бульбы. Усё паліць смятанай і рэштай алею. Запякаць у печы альбо духоўцы 30 хвілін.

Пры падачы да стала запяканку парэзаць на кавалкі, пасыпаць дробна пакрышаным кропам.

Рыба, тушаная з вяршкамі

Інгрыдыенты:

  • 1 кг рыбы (карп, карась, лешч, лінь)
  • 3 цыбуліны,
  • 1 морква
  • 1 шклянка вяршкоў
  • 1 ст лыжка сметанковага масла або 100 г сала
  • Соль
  • Перац
  • Лаўровы ліст

Як гатаваць:

Ачышчаную, выпатрашаную і прамытую рыбу, разрэзаць на кавалкі і пакласці ў адзін рад у каструлю, дадаць нарэзаныя цыбулю і моркву, а таксама соль, перац, лаўровы ліст. Заліць 2 шклянкамі гарачай, вады або рыбнага булёну і патушыць. У канцы ўліць гарачыя вяршкі і пакласці масла.

Замест масла можна выкарыстаць дробна парэзанае свежае сала, але яго трэба пакласці разам з агароднінай.

Чытайце таксама:

Тэмы:
Прыродная сталоўка: гатуем з таго, што пад нагамі (43)
Тэги:
Беларусь, Нацыянальная кухня, Ларыса Мятлеўская

Галоўныя тэмы